Umhlangano wabasakazi abavela kuzwekazi leAfrica langaphandle, oqhutshwe yinhlanganiso yeAfrican Union of Broadcasting (AUB) ufike emaphethelweni kweleGaborone namuhla lapho inhlanganiso le eyamukele khona amalunga amahlanu amatsha agoqela umsakazo we Voice of America. Inhlanganiso ye AUB ithi inhloso yikuthi iqhubeke iqhela ngaphandle kwezwekazi leAfrica.
Eminye imsakazo esingene kunhlanganiso le igoqela iSputnik, iRussia Today, iMuslim Television Ahmadiyya kumbe MTA Africa kanye le National Radio and Television Administration of China.
Lokhu kutsho ukuthi inhlanganiso lezi, zona ezidabuka emazweni angaphandle kwezwekazi leAfrica kodwa zisakaza eAfrica, sezizenelisa ukwabelana inhlelo eziphathelene lezwekazi leli leminye imisakazo engamalunga awe AUB.
African Union of Broadcasting conference
Okade emmele iVOA kulomhlangano, umqondisi wenhlelo ekhangele ngeze Africa, uMnunzana Mwamoyo Hamza, uthi kulinyathela eliqakathekileyo ukuthi babambisane leminye imsakazo e Africa ukuthuthukisa inhlelo zikazulu.
“I AUB ivule amehlo ngokwenzakala emhlabeni jikelele, ngakho lokhu kuyathabisa ngoba sonke sizadinga amacebo okuhambisa phambili uhlelo lokusakaza eAfrica.”
UMnunzana Abdoulie Sey, okade emele umsakazo weGambia Radio and Television Service, ekhuluma leStudio 7, uncome inyathelo elithethwe ngumsakazo we VOA kanye lamanye ukuthi angene kunhlanganiso ye AUB.
“Kuqakathekile kakhulu ngoba kutsho ukuthi umhlaba wonke jikelele usunanzelela umsebenzi we AUB. Kuyatshengisa njalo ukuthi amazwe angaphandle azimisele ukuqhuba ibhizimusi lezwekazi leAfrica.”
African Union of Broadcasting conference
UNkosikazi Chelbi Karima, ongumqondisi obona ngokwabelana inhlelo eziphathelene le Africa phakathi kwamalunga awe AUB, uthi inhlanganiso le isitshengise ukuthuthuka, yikho isenelisa ukukhanga amalunga avela ngaphandle kwezwekazi leAfrica.
“Umhlangano lo uqakatheke kakhulu ukuthi sithuthukise amalunga ethu awe Africa njalo futhi sibe lobudlelwano lemisakazo engaphandle kwe Africa. Lithuba elihle ukuthi sintshintshane imbono etshiyeneyo.”
Kusenjalo, uHamza uthi umhlangano oqhutshelwe eGaborone utshengise ukuthi abasakazi beAfrica bazimisele ukuguquka phezu kokuntshintsha kwesimo esilethwa kakhulu yikusebenzisa imtshina ukuthapha indaba okugoqela ukukhalipha kokuzibazela iArtificial Intelligience.
“Kuyathembisa ngoba kuyatshengisa ukuthi abantu bazimisele ukuguquka njalo bakhuluma ngelizwi linye ukuthi bathuthukise ezokusakaza kuzwekazi leAfrica.”
UMnunzana Njabulo Ncube, umqondisi kunhlanganiso yeZimbabwe National Editors Forum, uthi kutshengisa ingqubela phambili ukuthi i AUB ibelamalunga avela phandle kwezwekazi leAfrica.
“Kusiza ku Artificial Intelligience, sekulendlela ezilula ezokuthi balungise imbiko yabo, balungise inhlelo zabo. Ukuza kwabomakhala ekhukhwini kwenza umsebenzi wokuthapha indaba ukuthi uguquke. Into lezi zilakho ukusentsheziswa ekugangeni kumbe ekuthuthukeni.”
Inhlanganiso ye AUB yasungulwa ngomnyaka ka 1962 ngaphansi kwe gama elithi Union of African National Television and Radio Organisations. Kwathi ngomnyaka ka 2006 yaguquka ibizo yaba yi African Union of Broadcasting, njengoba isaziwa lamuhla. Inhloso yalenhlanganiso yikuthuthukisa ezokusazaka, ikakhulu udaba lweAfrica, njengoba lubikwa zintathelizi zezwekazi le Africa.