Inhlanganiso yabafuya inkukhu eye Zimbabwe Freerange Poultry Producers’ Association isifundisa amalunga ayo indlela zokuqhuba umsebenzi lo njenge bhizimusi elingabatholisa inzuzo.
Inhlanganiso le ikhuthaza ukuba abafuyi benkukhu besebenze ndawonye ukuze benelise ukutholisa amavinkili inani elenelayo lenkukhu lezi zikhathi zonke.
Okhokhela linhlanganiso le, uNkosikazi Beauty Jiji, uthi bajonge ukufundisa abafuyi ukuba kulendlela ezinengi zokuthuthukisa lumsebenzi okungabanikeza inzuzo ngaphandle kokufuya lokuthengisa inkukhu.
Inkukhu ze freerange zigoqela inkukhu zasemakhaya ezijabulelwa ngabanengi ezidume ngegama lokuthi ngamaroad runner, amadada, izigwaca lokunye.
Uthi okwamanje balwisana lokuba bezifuye ngobunengi bazo ukuba zingasileli emavinkilini njalo bathengise bemanyene okuhlanganisela abasakhulayo labogogo emaphandleni abahlala vele bezifuyela inkukhu ezinje.
UMnumzana Isidor Charamba, ophethe umsebenzi wokudinga imikambo yokuthengisela inkukhu ezinje, uthi abantu bayazikhwabitha okwamagama elizweni lonke njalo kulethuba lokuzithengisela laphandle kwelizwe okokuthi sebelemizamo yokuthi bevule izilaha abangazihlinzela khona njengenhlanganiso ukuze zamukelwe emavinkilini sezilungele ukuthengiswa.
Your browser doesn’t support HTML5
Udaba Esilethulelwe NguMark Peter Nthambe
Uthi imbangela yokuthakazelelwa kwenkukhu ezinje yikuba zilenyama eyakha umzimba. UCharamba uthi inkukhu lezi zehlukene lezinye eziphiwa ukudla okulinywa ngemithi okukhula masinya okwama Genetically Modified Organisms (GMOs).
Abe Zimbabwe Freerange Poultry Producers Association bathi bakhuthaza abantu ukuba befuye lezinkukhu njengendlela ababevele beyenza lasendulo zizidlela ama whemusi, amabele lokunye okunjalo bengahlanganisi lemithi eminengi nengi.
Inhlanganiso le, ilamawofisi e Harare, eMutare lako Bulawayo njalo ikhangelele ukuvula amanye ezabelweni zonke kusikhatshana esilandelayo.