Ikhomishini ebona ngezokhetho eye Zimbabwe Electoral Commission (ZEC) lokhe ingakanikezi amabandla ezombusazwe ugwalo lwamagama abantu ababhalisele ukuvota iVoters’ Roll, sokusele insuku ezimbili ukuthi idale lokubhalisela ukuncintisa ekhethweni eleNomination Court lihlale.
Kumaviki amabili edluleyo umongameli welizwe wethula usuku okuzakwenziwa ngalo ukhetho njalo iZEC yathembisa ukuthi uluhlu lwamagama abantu ababhalisele ukuvota iVoters Roll izatholakala ebulenjini kodwa lokhu akwenzakalanga.
Uluhlu lwamagama abantu ababhalisele ukuvota iVoters Roll ibisezandleni zabaphathintambo bamawofisini aweZEC okwakuqala koBulawayo ngoLwesine lobanje amabandla ancintisayo ekhethweni engenelisi ukuyithola.
UDistrict Elections officer wako Bulawayo, uNkosikazi Sithembiso Khuphe, uthi iVoters’ Roll isibuyile ethi khona bezaqala ukuhlola amaphepha ababhalisela ukuncintisa ekhethweni.
“Ama voters’ roll ethu asebuyile sesizakhangela ke amacandidates alethileyo kusukusela ngoMqgibelo ama candidates abeletha amaphepha kodwa besingawakhangeli kodwa kusukisela kusasa sizabesiwakhangela. Nxa bengekho kuvoters’ roll siyakufonela uzothatha amaphepha akho uwalungise.”
Abamabandla ezombusazwe akhalaza kakhulu ngokuswelakala kweVoters’ Roll bethi bekufanele ngalesi sikhathi selufinyelelwa ngumuntu wonke ukuze benelise ukuhlola ukuthi abantu ababasekelayo babhalisile.
Omunye walabo nguMnu. Abedinico Bhebhe, owebandla leMDC T ekhokhelwa nguNkosikazi Thokozani Khuphe, othi le ngenye yendlela yokubaqala.
“Kungaba ngezinye indlela ezokuthi basicunulwe kodwa esikwenzileyo thina sithe abasisayinelayo uyathatha iregistration slip yakhe kanye lesithupha ukuze ubone njalo ube lobufakazi obokuthi umuntu osayinileyo ngoqondileyo.”
UMongameli weMthwakazi Republic Party, uMnu. Mqondisi Moyo, uthi kuyadanisa ukuthi idale leNomination Court lihlala ensukwini ezimbili belokhe bengabonanga iVoters’ Roll.
“Kuyasidanisa ukuthi sekusele insuku ezimbili ukuthi iNomination Court ihlale iZEC ayikakhiphi ivoters’ roll, okusikhangelayo sobala yikuthi sokuyindlela yokwenza ukhetho lungathembeki.”
UMnu. Mbuso Siso, isikhulumi seMDC ekhokhelwa nguMnu. Welshman Ncube, uthi bayakusola ukungavezwa kweVoters’ Roll ethi njengo manyano weMDC Alliance yikho betshengisele ngeviki edluleyo bekhonona.
“Njengoba ubonile kuviki ephelileyo I Alliance yence iMarch eHarare ikhala ngengxenye yezinto okhuluma ngazo okutshengisela ukuthi kulobutsotsi obufuna ukwenziwa libandla elibusayo.”
Idale lokubhalisela ukuncintisa ekhethweni eleNominations Court liyahlala ngoLwesine kuyonale iviki mhla ka 14 Nhlolanja njalo kumele abancintisayo kumele basekelwe loba ukusayinelwa ngabantu ababhalisele ukuvota. Ngenxa yokungavezwa kogwalo lwamabizo ababhalisele ukuvota akwaziwa ukuthi bazakwenelisa na ukuthi babhalise ukuze bancitise kukhetho.
Your browser doesn’t support HTML5
Udaba Esilethulelwe NguMavis Gama