Ingcwethi kwezomnotho,abamankampani kanye labosomabhizimusi bayavumelana ukuba eleZimbabwe selikusimo esibi kakhulu kwabafuna ukuzasungula amabizimusi kilo.
Uhulumende ukuthazwe yikuthi adinge ezinye indlela eziqinileyo zokuvuselela umnotho ngaphandle kwaleyo ndlela elandelwayo yeStaff Monitoring Programme, ngokusebenzelana labenhlanganiso ye International Monetary Fund – IMF.
Lokhu kuphume emhlanganweni wokubonisana phezu kokungenziwa ukuvuselela umnotho weZimbabwe,owenzelwe ewoteleni ye Meikles eHarare lapho ingcwethi kwezomnotho lezi kanye lohulumende, bebewelelana ukuba inguquko uqobo kwezomnotho,izakubonakala ngemva kokuba ilizwe selanelise ukuzihlawula lezo zikwelede zenhlanganiso okubalisa eye IMF,World Bank,African Development Bank kanye labamazwe akumanyano we Paris Club akweledisa imali.
Lezingcwethi zithi kumqoka ukuba uhulumende azinikele kulokho ayabe ekutshilo ukuba uzakwenza hatshi ukube lokhe beguquka kokuphela.
Umphathintambo wogatsha lwezemali,umnumzana Patrick Chinamasa utshele umhlangano munye ukuba uhulumende uzumisele kulokhu kulokhu kubonisana lokuxoxisana,kudingwa indlela ezingasetshenziswa ukuzibhadala lezo zikwelede zelizwe,ukuze lanelise lalo ukuzifinyelela lezo mali kunhlanganiso okubalisa eye IMF,ukuthuthukisa umnotho welizwe.
Kunje igama lelizwe selingcole kakhulu,engekho osalithemba, kungekho lapho ilizwe lingatholiswa khona lezi zimali ngaphandle kokuhlawula lezo zikwelede kizo zonke inhlanganiso lamazwe ehlukeneyo,kutsho uChinamasa.
Uthi makungangeniswa ezombusazwe, kukhangelwe inhlelo zelizwe ukuba zilungile loba hatshi.
Ukhokheli wequla le IMF elikuleli ukuzabona ukuba eleZimbabwe liqhuba njani,uDr Daminaco Fanizza uthi kumqoka ukuba ilizwe lazi ukuba bukhulu ubudlelwano obukhona phakathi kokukhulumisana lezomnotho.
Loluhambo lokudinga ukulungisisa umnotho welizwe,uFanizza uthi lungelula,luzathatha isikhathi eside ukuba bufezeke ubuhle balo,impumela yaleyo mizamo eyenziwa lamuhla izakuba ngejabulisa uzulu kwelakusasa lanxa lubuhlungu.
Uthi kunje eleZimbabwe linganelisi ukuyithola leyo mali yezikwelede,ephathisa ukuqhuba inhlelo zentuthuko ngoba lilokhe lingakazibhadali elazithatha emuva.
UProffesor Mthuli Ncube ngomunye walezingwethi obezikulomhlangano,waqonqosela ukuqakatheka kokubonisana phezu kokuvuselelwa kokukhulumisana.
Lanxa kuyinto encomekayo ukusebenzisa imali yakwamanye amazwe, uDr. Ncube uthi kumqoka ukuba ilizwe lisebenzise imali yalo sikhathi sonke ukuqhuba inhlelo zentuthuko lebhizimusi,eyangaphandle iletha inkinga enkulu.
Umqondisi wenkampani ye United Refinaries Limited,unumzana Busisa Moyo uthi kuqakathekile ukuba eleZimbabwe likhulumisane labanye,ukuvuselela ubungane obesebutshabalele.
UMoyo uthi sebuqinile ubudlelwano phakathi kwabamankampani, osomabizimusi lohulumende, kukanti bekungenjalo eminyakeni yangemuva, kubhekanwa ngelihlo elibi.
Ungenwe zingcwethi kwezomnotho,osomabizimusi,abanini mankampani, intathelizindaba kanye lenkokheli kungatsha zikahulumende lumhlangano wokubonisana phezu kokungenziwa ngaphansi kwesihloko esithi:ECONOMIC PROSPECTS FOR ZIMBABWE AND THE RE-ENGAGEMENT PROCESS.