Abezempilakahle bakhuthaza abakuhlelo lweART ukuba banathe amaphilisi ngendlela njalo abesifazana abakulolu hlelo bayehlolwa imvukuzane yomlomo wesibeletho ngomnyaka ngoba besithi igcikwane leHuman Papilomavirus livame ukuhlasela abesifazana abanengi abakuloluhlelo.
Amaphilisi ayehlisa igcikwane emzimbeni atholakala ezibhedlela lemakilinika lapho abezempilakahle sebekhuthaze uzulu ukuba anathe la maphilisi ngonanzelelo belandela imilayo yonke.
UDokotela Solwayo Ngwenya uchaza ukusebenza kwamaphilisi ehlisa igcikwane lengculaza
“Amaphilisi eARV aphiwa abantu abalegcikwane , emzimbeni abulala igcikwane egazini, umuntu enawathatha isikhathi esida icikwane liyaphela emzimbeni lisale kwezinye izitho zomzimba njalo asikhwabithi ukuba abantu benawanathi ngonanzelelo ngoba benayeka kuyakulalis phans.'’
Uqhubeke ethi akumelanga abantu banathe amaphilisi asephele amandla ngoba eyingozi.
“Amaphilisi wonke ase expire akumelanga uwasebenzise kumele alahlwe njalo kulendlela ezilandelwayo ukuwatshisa la maphilisi.”
UNgwenya ukhuthaze omama abanatha la maphilisi ukuba bayehlolwa imvukuzane yomlomo wesibeletho ngomnyaka ngoba ivame ukubahlasela.
“Omama abanatha amaphilisi la kumele bayehlolwa imvukuzane yesibeletho, kubomama kuqakathekile ukukhangelwa umlomo wesibeletho ngoba imvukuzane yesibeletho leyegcikwane ziyakhulisa kakhulu umkhuhlane wemvukuzane yesibeletho.”
Kusenjalo ikhansili yedolobho lakoBulawayo ithi uhulumende esebenzelana logatsha lwezimithi, olweMedicines Control Authority of Zimbabwe, sedlulisele phambili ukusebenza kwamaphilisi awokwenqabela ukumemetheka emzimbeni kwegcikwane leHIV, amaARV, kusiyafika ekupheleni kukaNtulikazi loba ebemele ecine ukusebenza ngomnyaka odluleyo ngoNtulikazi.
Inengi labantu abakuhlelo lokuthola amaphilisi okwehlisa isilinganiso segcikwane emzimbeni bakhonona ngokutholiswa amaphilisi abathi asemele engabe awaphiwa abantu.
UMqondisi wezempilakahle kukhansili yedolobho lakoBulawayo, uDokotela Khulamuzi Nyathi uchaza isizatho sokupha lamaphilisi.
“Thina njengekhansili yakoBulawayo silamakilinika alitshumi latshiyangalonye lapho esilohlelo lokutholisa amaphilisi ayehlisa igcikwane emzimbeni esiwaphiwa nguHulumende njalosilamaphilisi esawaphiwayo akhangelele ukuma ukusebenza mhlaka 30 Nhlangula ngesicwayiso seMedicines Control Authority of Zimbabwe ngemva kokuhlolwa ukusebenza kwawo zingcitshi.'’
UDokotela Nyathi uchaze ukuba kulabantu abedlula inkulungwane ezingamtshumi amahlanu koBulawayo abanatha amaphilisi okwehlisa igcikwane emzimbeni.
“Thina edolobheni silabantu abafika inkulungwane ezingamatshumi amahlanu abathola amaphilisi ehlisa igcikwane lobanje uhulumende ephakathi kokuzama ukuqondidisa inani labantu abanatha la maphilisi ngoba okwamanje alikacaci”
Labo abangazwisisi ngokuma kokusebenza kwala maphilisi bakhuthazwa ukuba bakhulume labongi emakilinika alapho abathatha khona amaphilisi.
“Labo abalokuthandabuza ukusebenza kwalamaphilisi sibakhuthaza ukuba baye emakilinka alapho abathatha khona lamaphilisi njalo abantu kumele banayeki ukunatha lamaphilisi abawaphiwayo emakilika.”
Abantu sebenatha amaphilisi okwehlisa igcikwane emzimbeni belokuthandabuza ngoba abawaphiwayo abhalwe ukuba aphela amandla kumnyaka odluleyo NgoNtulikazi.
Your browser doesn’t support HTML5
Udaba lwamahiisi ehlisa igcikwane siluphiwa nguAnnahstacia Ndlovu
Odokotela bathi uhulumende kathenganga impahla zokusebenzisa ezibhedlela zakhe, ezigoqela imithi lokunye, njengalokho akutshoyo kulandela ukutshengisela kwabo ngevikivi edluleyo.
Lokhu kwenzakala kulabantu abatshonileyo kumbe abalimeleyo ngenxa yezulu lesiphepho eleCyclone Idai ezigabeni zeManicaland, Mashonaland Central, kanye leMashonald East abazangezelela inani labadinga usizo lwalezi izibhedlela olufana lemithi kanye lezindlu zamakhaza ezama mortuary.
UMgcinisihlalo wenhlanganiso elwela amalungelo ezakhamizi eGwanda, uMnu. Bekezela Maduma Fuzwayo, uthi kufanele uhulumende aqakathekise inhlelo zokuthuthukisa ezempilakahle.
Your browser doesn’t support HTML5
Ingxoxo loMnu. Bekezela Maduma Fuzwayo