Izakhamizi zemaphandleni ezinengi eMatabeleland South lokhe zihlangana lengxaki ezitshiyeneyo ezenza zehluleke ukubhalisela ukuvota kukhetho oluzayo.
Isizatho esimqoka ngesokuthi inengi kalilazithupha.
Isabelo seMatabeleland South silabantu abazinkulungwane ezedlula amakhulu amathathu lamatshumi amahlanu (356 000) abalelungelo lokuvota njalo inengi labo lisemaphandleni.
Okwakathesi sekubhalise abantu abazinkulungwane ezingamakhulu amabili lamatshumi amabili (221 000) okutsho ukuthi abedlula inkulungwane ezilikhulu lokhe bengakabhalisi.
Asebehluleke ukubhalisa ngezizatho ezitshiyeneyo bazinkulungwane ezintanthu lamakhulu amahlanu (3500).
Your browser doesn’t support HTML5
Udaba Siluphiwa nguAlbert Ncube
UNkosazana Sikhangezile Ndlovu ohlala eDhewe, eNatisa, ngomunye wabantu laba.
“Siyaswela ukuthi senzeni ngenxa yezithupha zona lezi ngoba ungafika ezithupheni, bayadinga izinto ezinengi kakhulu,” kutsho uMaNdlovu.
Esinye njalo isakhamuzi seNatisa, uNkosazana Sithembiso Tshuma uthi okunye okwenza inengi lehluleke ukubhalisa ngumango omude.
“Nxa ngibana ngisuka kimi lapha; 7 kilometers. Mina ngingakwanisa ukuhamba kodwa abantu abadala abakwanisi, bakhala nge-transport,” kutsho uNkosazana Tshuma.
Inhlanganiso ezitshiyeneyo ezigoqela iZimbabwe Elections Support Network ziphakathi komkhankaso wokuhuga uzulu ukuthi ebhalisele ukuvota ngobunengi.
UMongameli Emmerson Mnangagwa uthi ukhetho lolu luzakwenziwa inyanga kaNtulikazi ingakafiki. Kodwa amagqwetha athi lokhu kuyabe kuyikwephula umthetho.