Ukusilela kwamajekiseni awokwenqabela i-COVID 19 kubikwa kuqhubeka elizweni, abanye besithi bayabuyiselwa emuva nxa bezama ukuyahlatshwa kwezinye izibhedlela lemakilinika.
Lokhu kwenzakala ngesikhathi ugatsha lukahulumende olubona ngezempilakahle lusithi abantu abedlula inkulungwane ezingamakhulu ayisithupha 648 121, sebehlatshiwe ijekiseni le.
Isiphathamandla esibona ngezempilakahle koBulawayo uDr. Welcome Mlilo ubikwa esanda ukugcizelela ukuthi ngempela uhlupho lolu luyatholakala lakoBulawayo ngenxa yokuthi banengi abantu abafuna ukuhlatshwa amajekiseni la. Uhulumende ubikwa esithi uzakwaba kutsha amajekiseni la ukwenzela ukuthi atholakale kuzigaba zonke zelizwe.
UMnu. Tinashe Gumbo ohlala eHarare uthi ubezimisele ukuhlatshwa ijekiseni okwakuqala ngoMgqibelo odluleyo kodwa waziswa ukuthi ayikho eHatfield, Breaside, Belvedere, le Parirenyatwa. Uthi utshelwe okufanayo ngoLwesihlanu eWilkins, njalo ukhuthaza uhulumende ukuthi alethe amajekiseni la ngoba kulabantu abazimisele ukuyahlaba, njengaye, okulinyathelo elihle.
Your browser doesn’t support HTML5
Ingxoxo loMnu. Tinashe Gumbo
Kusenjalo, ugatsha lukahulumende olubona ngezempilakahle luthi inani labantu asebahlaselwa ligcikwane leCoronavirus selokhe laqhamukayo ngomnyaka odluleyo sebefika phose inkulungwane ezingamatshumi amathathu lasitshiyagalolunye-38 854 labulala asebezafika inkulungwane elamakhulu ayisithupha, 1592.
Lokhu kwenzakala inani lasebetholakale belegcikwane leli ekolitshini leBondolfi Teachers College eMasvingo selikhuphukile laya kukhulu lantathu-103 kulandelwa ukuhlolwa kwezinye izifundi njalo ngoLwesine.
Uhulumende uthi usuthisekile ngendlela aphethe ngayo loludaba kulelokolitshi, lapho abalegcikwane abalondolozwe khona ukwenzela ukuthi bengamemethekisi igcikwane leCoronavirus. Idolobo leKwekwe selingena kuviki yesibili yeLockdown, ngemva kokutholakala komuntu owayelegcikwane leCOVID 19 elabonakala kuqala kweleIndia.