Izakhamizi zemaphandleni zithi umnyaka ka2018 ubunzima kakhulu kungakho kazisoze zilithakazelele ilanga lekhisimusi yalonyaka ngenxa yokubhidlika komnotho welizwe, osekubangele ukukhuphuka kwentengo yempahla ezitolo.
Imuli zivame ukuthi zihlangane ngalelilanga ziphane izipho,kudliwe ezifela emlonyeni kunathwe, kuthi okhekhe bathengelwe izigqoko ezintsha.
Kodwa lonyaka, inengi lithi ikhisimusi izafana lamanye nje amalanga.
UNkosazana Salani Ncube, oweSitezi uthi babhekane lendlala embi kakhulu.UMnu. Mholi Khumalo oweLumene uthi umnyaka ka2018 ubunzima kakhulu.UNkosikazi Sibonginkosi Sibanda oweSibhula uthi ukuqonga kwentengo yempahla ezitolo kubatshiye betshaywa ngamakhanda.
UMnu. Brighton Nare oweNtalale uthi ilanga lekhisimusi lonyaka lizedlula njengawowonke amalanga ngoba inengi labantu lingelamali.Inengi lezakhamizi lithi okubadanisayo yikuthi inkokheli abazikhethayo kwezombusazwe kazisafiki ukuzokuzwa izikhalazo zabo. UNkosazana Agnes Mbangeni owe Gwanda North uthi abakaze bembone ummeli wabo wedale lephalamende selokhu bavotayo.
Ngaphandle kokusilela kokudla, okunye okulakho ukuswelakala kulikhisimusi ngamanamnede kanye lotshwala khona okungasatholakali ezitolo lemabhawa.
UMnu. Gabriel Moyo oweMawane uthi kuyadingeka ukuthi uMongameli Emmerson Mnangagwa ahlale phansi lomkhokheli webandla leMDC uMnu. Nelson Chamisa becubungule okuhluphayo, ukuze elakusasa libengcono.
Ikhisimusi yalonyaka iza ngesikhathi odokotela bekhalale imisebenzi lababalisi betshengisela besithi bafuna ukuholiswa ngedola leMelika.
Ukusilela kwemali emabhanga kanye lamafutha ezimota emagalajini kuqhubekela phambili lanxa uhulumende ephethe esithi uyalungisa loluhlupho.
Your browser doesn’t support HTML5
UAlbert Ncube Uyalandisa