Inengi koBulawayo lithi kufanele uhulumende avule ezinye njalo indawo emphakathi ezokuthi abantu bahlatshwe ijekiseni yokwenqabela iCOVID 19 ngoba isibhedlela seMpilo, United Bulawayo Hospitals, kanye lese Ngutsheni zisandelwa.
Lokhu kwenzakala inani labantu abatholakala belomkhuhlane lo likhuphuka amalanga wonke, njalo ugatsha olubona ngezempilakahle lusithi sokulabanye njalo abedlula inkulungwane lamakhulu amane-1,442 abahlaselwe ligcikwane leCoronavirus, labulala abangamatshumi amathathu lantathu-33, ngelanga elilodwa eledluleyo.
Embikweni owethulwe ngoLwesihlanu, ugatsha lwezempilakahle luthi lokhu sokukhuphule inani labantu asebahlaselwa yileligcikwane selokhe laqhamukayo ngomnyaka odluleyo laya kunkulungwane ezedlula kancane amakhulu amahlanu 52, 663 labulala abafika phose inkulungwane ezimbili 1, 841.
Inani lasebehlatshwe ijekiseni yokwenqabela leligcikwane selisedlula amakhulu azinkulungwane eziyisikhombisa 788, 004.
Kusenjalo, izakhamizi zemaphandleni esixoxe lazo zithi lanxa kudingeka ukuthi kwenqatshelwe ukumemetheka kwegcikwane leCoronavirus zizathwala amagabha avuzayo ngoba ziphila ngokudla ezikuthenga ezitolo emadolobheni.
Inengi lithi lathwala nzima ukufinyelela emadolobheni nyakenye lapho kuvalwe ilizwe okwakuqala, okwadala ukuthi kubelukhuni ukuthenga ukudla kanye lemithi.
UNkosikazi Shelina Moyo oyisakhamuzi seSitezi eGwanda North uthi lokhu kuzaletha indlala emakhaya.
Amazwi la agcizelelwe nguNkosikazi Betty Mlilo esinye njalo isakhamuzi seSitezi.
UMnu. Gabriel Luphondo oyisakhamuzi seMawane uthi sekunzima ukuhamba kulezinsuku ngoba ezinye izimota ngaphandle kwezenkampani yeZUPCO zingasavunyelwa ukuthwala.
UMqondisi wenhlangansio elondoloza amalungelo abesifazana eyeWomen Development Association of Zimbabwe uNkosikazi Juliet Nkiwane uthi umbiko wokuvalwa kwelizwe ujume abanengi.
Ngaphandle kwalokhu uthi inengi lezakhamizi kalikahlatshwa ijekisieni yokuvikela leligciwane.
Edolobheni leGwanda amajekiseni okwenqabela i-COVID 19 ayasilela njengakwezinye indawo zelizwe. UMnu. Wellington Nare isakhamuzi seGwanda uthi uhambe ekilinika izolo elejongo yokuhlatshwa lijekiseni waziswa ukuthi ayikho.
NgoLwesine, uMongameli Emmerson Mnangagwa wethule umbiko wokuthi uhulumende uthole amajekiseni azinkulungwane ezingamakhulu amahlanu ngempelaviki, wathi amanye ayizigidi ezimbili ayeza kunsuku ezilandelayo.
Your browser doesn’t support HTML5
UAlbert Ncube Uyalandisa