Indwangu lenkawu eGaranyemba seziphila ngezifuyo ngenxa yendlala njalo sezingena emakhaya zidinga okukudla. Ukungani kuhle kwezulu sekutshiye iganga liligceke kungela kudla kwenyamazana zendle.
Izakhamizi zeGaranyemba zithi azisabuquthi ubuthongo ngenxa yalezindwangu lenkawu okubikwa zihamba lebusuku zidinga okokudla.
UNkosikazi Sibusisiwe Ndlovu ohlala edamu leMshandira uthi sebephelelwe zimbuzi ngenxa yenyamazana lezi.
“Silohlupho kakhulu ngendwangu, ngikhuluma nje mina ngangilamazinyane angu 10 ngisalelwe ngamazinyane angu 2.Lamhla ekuseni ngitshiye zikhona okokuthi ngizathi ngibuyela ngithole sezingenile ,ziyangena esibayeni zibambele phakathi singazi kumbe singancediseka ngoba sesiphelelwe zimbuzi.”
UMnu. Fakazi Sibindi oweMawane 1 Village laye uthi indwangu sezibaqedele izifuyo njalo bazalima nzima lonyaka nxa zilokhu zibhekane lendlala.
“Ezibayeni loba lisekhaya ziyangena zithathe amazinyane okokuthi vele asisafuyanga lokufuya indwangu seziqedile izifuyo zethu,lonyaka kukhanya umumo mubi sibili , indwangu zisubula ingxoza yombankali okungangokuthi lezihlala kazisekho kutsho ukuthi ngendlela ezenza ngayo lonyaka kasisoze senelisa ukulima .”
UNkosikazi Margaret Ndlovu ohlala koShokoshi uthi sezingena lezindlini lezinyamazana zeganga zidinga okokudala.
“Ngisuka eShokoshi indwangu ziyahlupha konke kuyangena lezindlini kuwona,uthole kuwonile, lembuzi seziphelile.”
USobhuku weMatawa uMnu. Caleb Sibanda uthi zithwele nzima izakhamizi ngendwangu lezi.
“Silodubo lwendwangu lapha seziqede imbuzi ziyangena lemakhaya lenkukhu ,sezilohlupho indwangu asazi kumbe singathola ukuthi zixotshwe kumbe zibulawe ,thina kudala sikhula kwakuthiwa indwangu kayihambi ebusuku kathesi ziyahamba lebusuku uyathi ulele uzwe imbuzi sezikhala esibayeni.”
UKhansila weGaranyemba uMnu. Miclas Ndlovu uthi ngaphandle kwendwangu lenkawu, insingizi lazo zihlasela inkukhu.
“Kulalesingizi seziqedile inkunku,zisuka egangeni zizodinga ukdla lapha emakhaya,indwangu lazo akusela mnyiye lomtshwankela egangeni ,zingabona kuthulisile ziyathatha ubukhokho azitshiyi lutho,sezisidla lembuzi ngike ngakhuluma labeParks ukuthi bazozitshaya ngoba akusela mazinyane.”
Imizamo yokukhulumisana lababona ngokulondolozwa kwenyamazana zendle iyehlule.
Edolobheni leGwanda lakho izakhamizi zithwele nzima ngendwangu ezingena ezindlini zidinga okokudla.