Umahluli wedale leHigh Court, uJustice Thomson Mabhikwa, usevume isicelo senduna uFelix Nhlanhlayamangwe Ndiweni sokuthi aphiwe imvumo yokuhlawula isibambiso se-bail kusalungiswa udaba lokuphikisa isigwebo asethulelwa ngumantshi uNkosikazi Gladmore Mushowe.
'Kakhululwe uNdiweni'
USikhwicamfundo uWelshman Ncube, obebambisana lamanye amagqwetha inkampani yeMathonsi Ncube Law Chambers, uphathe udaba lolu ngokuveza okwehlela abanye abenza okufana loNdiweni.
UMabhikwa uthe uNdiweni kumele ahlawule amakhulu amahlanu amadola eZimbabwe ($500), ahlale emzini wakhe njalo aziveze emapholiseni kanye ngeviki.
Igqwetha elimele uhulumende, uKudakwashe Jaravaza, uthe akuvumi ukuthi uNdiweni aphiwe isibambiso se-bail njalo lokuthi isigwebo sakhe singaphoselwa eceleni ngumthethwandaba.
Okwenzakale phandle kwedale leHigh Court ngoLwesithathu ...
UMabhikwa uthe kavumelani lesicelo sika Jaravaza sokulandulela uNdiweni ilungelo lakhe lokucela imali yesibambiso ephikisana lesigwebo sakhe ngoba udaba lolu lulakho ukwesula icala likaNdiweni kumbe ukungalesuli njalo kuzathatha isikhathi ukuba idale liphume lempumela yesicelo sokwala isigwebo.
Mhlaka 19 ngoNcwabakazi emthethwandaba kamantshi uJaravaza watshele idale ukuba uNdiweni wadiliza isibaya lothango lwesinye isakhamuzi esingaphansi kwakhe, uMnu. Fettie Mbele, owayemangalele ikhosikazi lakhe uNkosikazi Nonkangelo Mpengesi Mbele ayemthole esemacansini leyinye indoda.
Abanye abantu akade besedale leHigh Court koBulawayo.
UNdiweni wapha isinqumo sokuthi ikhosikazi likaMbele liyelaywa kibo liphenduke kungadlula inyanga ezintathu.
Kodwa uMbele wakhetha ukuhlala laye okwabangela ukuba induna ithume abantu ukuba bayediliza uthango lwesibaya sikaMbele ukuze asuke esigabeni ngoba eyehluleke ukulandela isinqumo somthethwandaba wesiqinti sakhe. Lokhu kubikwa kwenzakala ngomnyaka ka2017.
Umonakalo wesibaya sikaMbele ubikwa ulesisindo samakhulu amathathu amadola - $300.
Bafuna ukuthi induna ikhululwe ...
Encwadini yesicelo sesibambiso se-bail, amagqwetha kaNdiweni athi isigwebo asitholayo asihambelani lomonakalo lo njalo akulampahla eyatshiswayo, lesikhali esasetshenziswa ukudiliza isibaya yisitsha esingasingozi.
UNdiweni ubikwa walandela amasiko lemithetho yesintu eqhutshwa lapho umuntu ethe waphambanisa esigabeni.
UNdiweni ubegwetshelwe ukuhlala entilongweni okomnyaka lenyanga ezine ngumantshi uMushowe. Umantshi wesula inyanga eziyisithupha esithi uNdiweni akumelanga enze amanye amacala ngalesos’ikhathi.
Izakhamizi azithumayo zathola izigwebo ezifanayo kodwa wathi kumele basebenze ezikolo lemakilinika bengaholiswa okwamahola adlula amakhulu amahlanu lamatshumi amahlanu lasithupha (256).
Kusenjalo, amalunga amane eMthwakazi Republic Party abotshiwe ngesikhathi uzulu esemthethwandaba elalele kuthoniswa udaba luka Ndiweni.
Ababotshiweyo nguPatrone Xaba, Ackim Ndebele, Prince Mazilankatha Ncube loMongameli Mlotshwa abavalelwe enkambeni yeCentral Police Station koBulawayo.