UNeville Mutsvangwa, indodana yesikhulumeli sebandla leZanu PF njalo lophethe uhlangothi lukahulumende olubona ngezabesifazana namuhla walelwe ukuhlawula isibambiso sebail ngumantshi eHarare.
UNeville owetheswa icala lokuthenga lokuthengisa imali okungekho emthethweni, othoniswa loMnu. Simbarashe Tichingana kanye loMnu. Elis Majachani, balelwe ngumantshi uDennis Mangosi ukuba behlawule isibambiso sebail.
Abathathu laba ababotshwe ngeviki ephelileyo batholakala belemitshina yokutshintsha imali, amakhadi amanengi amabhanga lokunye okuveza ukuba babetshintsha imali ngudlu.
Bayaliphika icala leli. UNeville wetheswa njalo icala lokusebenzisa imininingwane ye-Starlink okungekho emthethweni.
Bakhangelelwe ukuba bazabuyela emthethwandaba mhlaka 30 Nkwenkwezi.
Uyise kaNeville nguMnu. Chris Mutsvangwa oyisikhulumeli sebandla leZanu PF kuthi njalo unina ngophethe uhlangothi lukahulumende lwabesifazana.
Abazali bakhe badla amalahle ngodaba lolu besithi kukhanya engani ukubotshwa kwakhe kulezombusazwe. Abakuhulumende bayala ukukhuluma ngodaba lolu.
Ukuze sihlaziye okwenzakalayo, sixhume uMnu. Rejoice Ngwenya okunhlanganiso yeCommon Market for Liberal Solutions, othi kukhona okutshaya amanzi amnyama ngoba banengi kakhulu abantu eZimbabwe abatshintsha imali okungekho emthethweni.
SEE ALSO:
ingxoxo Esiyenze loMnu. Rejoice Ngwenya