Abantu abanengi babambe owangaphansi ngendlu kamuyi uRobert Mugabe ebizwa ngokuthi yiBlue Roof eyakhiwa ngabadabuka kwele China.
Longumuzi kamuyi uRobert Mugabe eHarare
Bathi isakhiwo lesi siyadanisa kakhulu ngoba izikolo ezinengi eZimbabwe kazakhiwanga ngemfanelo njalo kazilangwalo ezeneleyo.
Abakhulume lomsakazo weStudio 7 bathi bamangele bebona imifanekiso yesakhiwo sikamuyi esihle okumangalisayo. Bathi akuhambelani lokwenzakala ezikolo elizweni lonke jikelele ngoba izikolo ezinengi zikusimo esibi.
Bathi kunzima kakhulu ukuqathanisa izikolo zemfundo ephansi lemfundo ephezulu lendlu yakhe eseHarare.
Endlini kamuyi uRobert Mugabe eyaziwa ngokuthi yiBlue Roof.
Engakabi ngumongameli, umuyi wafundisa ezikolo ezimbalwa eZimbabwe laphandle kwelizwe. Wafundisa eHope Fountain, Empandeni High School, eZambia lakwele Ghana.
Isakhamuzi sakoBulawayo, uMnu Patrick Ndlovu, uqathanisa indlu kaMugabe lezikolo kanye leholo lababalisi.
Olwela amalungelo oluntu umabhalane jikelele weIbhetshu likaZulu, uMnu Mbuso Fuzwayo uvumelana loNdlovu.
Emzini kamuyi uRobert Mugabe eBorrowdale, Harare.
Osakhulayo uBakidzanani Dube uthi isimo sezikolo uma kuqathaniswa lendlu kamuyi uMugabe kuveza obala ukuba wayengelandaba lezemfundo loba engumbalisi.
Olwela amalungelo oluntu, uMnu Josphat Mzaca Ngulube, uthi umuyi ubelihlazo kwezemfundo ngesimo sezikolo ezweni uma kuqathaniswa lendlu yakhe.
UMnu Ndodana Moyo laye uthi indlu kamuyi uMugabe iveza ukuba ubengumhuquluzi wenotho abafundi bengelandawo zokufundela.
Endlini kamuyi uRobert Mugabe eHarare
Umuyi, obhubhele kwele Singapore eleminyaka engamatshumi ayisitshiyagalolunye lanhlanu - 95, utshayelwa ngabanye ihlombe abathi wathuthukisa ezemfundo. Ilizwe leZimbabwe laziwa ngokuba labantu abanengi abafundileyo lobanje abaqeda izifundo emakholitshini bengatholi imisebenzi.
Umuyi utshiye ikhosikazi lakhe, uNkosikazi Grace Mugabe, abantwana labazukulu. Ubedume ngokukhuluma iSilungu ebesiphuma ngamakhala. Akwaziwa ukuthi uzangcwatshwa ngaphi.
Your browser doesn’t support HTML5
Udaba Esilethulelwe NguAnnastacia Ndlovu