Uhlangothi olukhangele ukuqhutshwa kwemihloliso olwe Zimbabwe School Examination Council, selwethule indleko okumele zibhadalwe ngabafundi ukuze babhale imihloliso lonyaka. Uhulumende uthi uzaphathisa ngokubhadalela ingxenye yendleko lezi kodwa laloba kunjalo abazali bathi imali le inengi kakhulu ngoba iholo labo liphansi.
Uhlelo lokubhalisa ukubhala imihloliso yokugqiba umnyaka seluqalile eZimbabwe. Kodwa abantwana kanye labazali baveze ukukhathazeka bethi isikhathi abasiphiweyo sincane kakhulu ukuthi bahlanganise imali ezifunekayo.
Unkosikazi Claudia Machida okhulume emele inhlananiso yababalisi benaphandleni eyeAmalgamated Rural Teachers Union of Zimbabwe uthi kuzaba nzima kwabanengi lonyaka.
“Thina njengababalisi sizwa sihlukumezeke kakhulu ngemali eqanjwe yiZIMSEC ukuthi yiyo okumele ibhadalwe ngomtwana ngomtwana ukuze abhale imihloliso yakhe. Singakhangela abazali abanengi basedubeni lokuswela imali ngenxa yama economic melt down ngenxa yeCovid 19,mbona engani uhulumende yisikhathi okumele aprovide education yabafundi bethu according to section 75 of the constitution. Abantwana bonke kumele batholiswe ithuba ukuthi bakwanise ukufunda bakwanise ukubhala imihloliso yabo,uhulumende ukhuluma nge supluse of the budget sikhangelele ukuthi isupluse leyi ifakwe towards ukubhadalela abantwana iexam fees ngoba imali eqanjiweyo yimali enengi kakhulu.”
Umnunzana Vusumuzi Sithole ongumzali uthi imali efunekayo ilobuhle lobubi bayo nxa kukhangelwa umumo womnotho okhona elizweni.
"Ukukhwezwa kwemali ebhadalwayo ngama candidates for i O level le A level maybe singakhangela kabili okokuqala kumele sikhangele ama costs ekuprint lokuthi iZIMSEC ibhadale ama ivigilators. Siphinde sikukhangele futhi kweyinye iside ukuthi bona abantu baya afforder yini ungakhangela inengi labantu imali abaziholayo zimali ezincane kakhulu abanye bahola imali ezingaphansi kwe 10,000RTGS banye 20,000RTGS ukuze akunise ukubhadalela abantwana kwesinye isikhathi uyathola ukuthi ulomtwana kuO level laku A level kuyasuka kuhluphe lokhu usukhangela lamali abaziholayo akuhambelani."
Unkosikazi Sukoluhle Mdlongwa ngomunye wabazali olomtwana obhalayo lonyaka laye okhala ngokuqonga kwendleko.
"Ende sesilohlupho it's a very big challenge ukukhwela kwamaexamination fees ngoba inengi lethu abazali kasisebenzi siphila ngokuzithengisela. Plus umtwana ukuze afike kusigaba seOlevel kumbe Alevel uyabe udonse nzima. Pho manje nxa sekukhwele kangaka kuzaba yichallenge kakhulu ngoba bangaki abantwana abazakwanisa ukuyifika iOlevel or iAlevel nxa sivele sidonsa nzima ngeschool fees layo ekhwele kangaka, kunzima kakhulu it's a big challenge for us abazali ngoba abantwana abanengi balast year abenzanga kuhle kumele bebuyele esikolo.
Omunye wabasakhulayo abafisa ukuphinda ukubhala uNkosilathi Mpofu uthi abazali abayiholi imali efunekayo.
"Sesiyibonile imali efakwe yiZimsec eyeregistration imali enkulu kakhulu esingeke sikwanise ukuyihlanganisa ngesikhathi esincane esisiphiweyo. Mina ngangibhale last year upper 6 izinto azihambanga kahle kakhulu sonke njengoba sisazi kungenxa yeCorona virus sobengithi ngizaphinda lawa amasubjects ami angu4 lonyaka. Manje sengizaphinda ngithini njengoba kumele ngicrushe langapha iregistration fee yinkalakatha yemali, ngeke siyikwanise. Labazali bethu kabayiholi leyo mali. Besicela nxa kupossible lisizwele lathi njengamaprivate candidates kumbe i-government ingenele ukuze sikwanise ukuthi sibhale lonyaka ukwenzela ukuthi sifeze amaphupho ethu njengentsha yeZimbabwe."
Indleko zokubhadalela imihloliso yezinga le A level level ikunkulungwane ezimbili lamakhulu amane amadola eZimbabwe(ZW$2,400). Kuthi indleko yokubhadalela izinga le ‘O’ Level ingaphezu kwenkulungwane lengxenye(ZW$ $1,648.00). Laloba kunjalo uhulumende uthi yena uzabhadalela isilinganiso sokwedlula ingxenye ekhulwini -55% kuthi abazali babhadale anatshumi amane lanhlanu ekhulwini-45%.
Umbiko okhitshwe ngumphathintambo wezemfundo umnumzana Cain Mathema, uthi uhulumende uzakwenza isiqiniseko sokuthi abantwana besikolo ababhala imihloliso ezikolo benelise ukubhalisa ukuze babhale imihloliso yalonyaka kungela kuphanjaniswa.
Your browser doesn’t support HTML5
Udaba lwembadalo yemihloliso esibekwe yiZIMSEC lonyaka siluphiwa nguBathabile Masuku