Uhlangothi lukahulumende olubona ngezokulima lezifuyo olweAgricultural Extension Services luthi sokufe inkomo ezedlula inkulungwane ezilitshumi – 10,000 eMatabeleland South ngenxa yokuswelakala kwamadlelo lamanzi kusukela ngesikhathi kwaba lesikhudumezi somkhathi ese-El Nino, esabangela isomiso esikhulu eZimbabwe lakwamanye amazwe.
Ingcwethi yezifuyo kugatsha lukahulumende olwe-Agritex eZansi yeMaNdebeleni, uMnu. Hatitye Muchemwa, uthi inkomo ezedlula kancane inkulungwane ezilitshumi – 10,134 sezicubile esabelweni lesi okulesomiso esesabekayo. UMuchemwa uthi iziqinti ezilenkomo ezinengi ezifileyo zigoqela eseGwanda, Insiza, Matobo, Bulilima kanye leMangwe.
UMnu. Obert Jiri, umabhalane omkhulu wohlangothi lukahulumende olubona ngezokulima lezifuyo watshela ikomithi ekhangelane lesomiso lesi eyeDrought Action Committee mhlaka 19 ngoMpandula ukuthi kulenkomo ezifika phose inkulungwane – 900 ezacuba kuviki eyodwa ekuqaleni kwenyanga le esabelweni lesi.
Ziyaphela inkomo eMatabeleland South
Wabika njalo ukuthi kwacuba inkomo ezizinkulungwane ezintathu lengxenye 3,500 esabelweni lesi kusukela ngoNhlangula lonyaka kusiyafika kuMpandula. Wathi inkomo zasezicuba ngobunengi bazo ngoMpandula njalo kwakukhangelelwe ukuba lizakhuphuka inani lezicuba ngeviki. Kulenkomo ezedlula amakhulu ayisithupha 660,000 esabelweni seMatabelaleland South.
Uhulumende uthi uzama ukuhlenga inkomo ezedlula izigidi ezimbili 2,3 million ezibhekane lokuswelakala kwamadlelo lamanzi elizweni lonke. Usobhuku weMatshetsheni, uMnu. Lovemore Ndlovu, uthi isimo sibi kakhulu lonyaka kuWard 1 eGwanda North ngoba asetshile amanzi emadamu abawathembileyo.
Ezinye inkomo sezidinga ukudla edolobheni leGwanda eMatabeleland South
"Lokhu ngazalwayo angikaze ngikubone okunje ,sengile 55 years ezigcweleyo angikaze ngilibone lisesimweni esinje , kunje sivuka ekuseni sizolinda ukuthi izifuyo zibuye, zingabuya sesibona ukuthi zinganatha ngaphu zinganatha ngaphi ngoba vele ziyabanjelwa okokuthi okwezifuyo sizake sikhohlwe lamanzi, khonapha amanzi akhona aluhlaza njalo anuka phu sengani kulento efele phakathi yikho okukhona edamu leDzabadzimba okungangokuthi nxa uNkulunkulu engangenelanga sokuyikuphela kwezifuyo."
Amazwi la agcizelelwe nguMnu. Albert Ndiweni oyisakhamuzi kuWard 14 eKezi othi lonyaka inengi lizavala izibaya.
"Okulapha kwesabeka, akusela lutho olukhona , nxa kungaphambaniseka kuphuza ukuthi likhize abantu bazavala izibaya , bazavala sibili."
Inkomo ezisemaphandleni angaphansi kwedolobho leGwanda sezicubela edolobheni esezidinga khona amadlelo. Sixoxe lokhansila walelidolobho uMnu. Wellington Nare.
"Insimo senkomo eGwanda sinzima , inkomo ziyafa zifela , utshani abusekho egangeni sezibuya phakathi kwedolobho ,zinengi kakhulu njalo zifa mihla ngemihla ,inkomo ziyaphela ngobunengi bazo ,kuzwisa usizi , kubuhlungu kakhulu, ngikhuluma nje ikhona efileyo khonapha eduzane."
Lanxa uhulumende ephathisa abafuyi ngesikuba senkomo ukudla lokhu kubikwa kungeneli okudale ukuthi ezinye zicube.
SEE ALSO:
Udaba Esilwethulelwe NguAlbert Ncube