Abogatsha lukahulumende olubona ngokulondolozwa kwemvelo olweZimbabwe National Parks and Wildlife Management Authority - iZimParks, babika ukuba kusukela ngenyanga kaNcwabakazi, sekufe indlovu ezifika phose amakhulu amabili -193 eHwange National Park.
Lumbiko wethulwe yisikhulumele seZIMPARKS, uMnumzana Tinashe Farawo, othe ukufa kwendlovu lezi, ikakhulu kunyang’edluleyo, kubangelwe yisimo esibi sendlala esabangelwa yisikhudumezi somkhathi eseEL-Nino, esabangela ukuba izulu likhwame kumnyaka ophelileyo. UFarawo uthi esihonqweni lesi, amadlelo asagugudeka njalo lamanzi emachibini atsha.
“Kulobunzima obukhulu kakhulu eHwange. Indlovu ezifika 193 sezificakale zifile kodwa impondo zikhona, okwenza kubemqoba ukuba le yindlala. Akula kudla njalo lamanzi satsha emachibini okwenza okwamanje zinathe awezibhorane, lawo engeneli.”
UFarawo uthi ngesizatho lesi, ukulwisana phakathi kwabantu lenyamazana zendle kubekuzinga eliphezulu emizini engcelelane lesihonqo lesi.
“Indlovu bezifohla zisiyadinga amadlelo lamanzi, sithole ama distress calls amanengi kakhulu lonyaka elizweni lonke nje, kodwa ikakhulu esigabeni seHwange ngoba bekungahluphi indlovu kuphela, izilwane, ompisi zizingela izifuyo zabantu loba ezibayeni.”
Lokhu kufakazwa ngukhansila kaWard 7, eJambesi, uMnumzana Fanuel Mudimba, othi sekuyimvama ukuxotshaniswa zinyamazana lezi.
“Akusahambeki, indlovu yizo esezithethe indlela zabantu. Ebusuku abantu sebehlala nje emakhaya okokuthi kungaba le emergency kuba ngumthwalo onzima ukuthi izakhamizi ziphume.Ngesikhathi sokulima, emasimini khona vele asisakhulumi ngokuvuna ngoba loba kuluhlaza ema park, kazisakufuni ukudlela khona.”
UMnumzana Ability Moyo, isakhamuzi sakoMvuthu esihlala eBH26, uthi inhlalo esigabeni lesi ayisahlabusi ngenxa yenyamzana zasendle ezinquma loba libalele.
“Asiselandawo yokudlisela, indlovu ziyabhoda lezilwane seziphila khonapha. Yindaba esithwalisenzima, akuselahlobo, akuselabusika sekufanana nje ukuhlala kwethu sekubuhlungu kakhulu ngoba yindawo esazohlaliswa khona kuthiwa yi special area, njani sidubeka so.”
UNkosikazi Thobile Dube wesigabeni seBH25 uthi izibaya sezavalwa, ikakhulu ezembuzi.
“Izilwane ziyatholakala loba emini zizihambela nje njalo ziyafika ebusuku zize zizihambele ngabo 8, thina sihlala sisevalweni izikhathi zonke, loba abantwana besikolo behamba bahlangana lzo
Kokungenziwa ukunqabela lokhu, uMoyo uthi abeZIMPARKS kabasondele duze lezakhamizi.
“Thina esazalelwa lapha, sasibona amakhiwa ezithinta inyamazana zabo, pho laba ke abavika ngokuthi ngezethu, kusizwisa ubuhlungu kakhulu ngoba kasitholi lutho lakunyamazana zakhona.”
UKhansila uMudimba laye ubona solinye.
“Kabakhe ama camps azabaduze labantu ngoba kwezinye izikhathi siyafona bengabuyi ngenxa yokubude bomango.Kababuye ebantwini.”
EVictoria Falls lakho izakhamizi zikhala ngokuhlutshwa zinyathi lazo ezinquma emgwaqweni loba libalele. UFarawo uthi izikhalazo lezi kazikho emahlombe abo kuphela, ngesizatho sokuba sebenika amakhansili amandla okuhambela inhlupho lezi.
Ukhuthaza izakhamizi ukuba zisondele nxa zilohlupho ukuze inyamazana zasendle ezibakhathaza nsukuzonke zibulawe, ezinye sisuswe ebantwini.
UFarawo uthi basaphezu kophenyo lokuloba inani labantu ababulawa kumbe balinyazwa zinyamazana lezi lonyaka.
SEE ALSO:
Udaba Esilwethulelwe NguNokuthaba Dlamini