Inhlanganiso ephathisa abalambayo emhlabeni jikelele eyeCare International ithi inani labantu abahlaselwe yindlala eZimbabwe selikhwele laya kuzigidi ezintathu ezilengxenye, 3,5 million lanxa nje uhulumende elokhe esithi abantu laba baphansi kwezigidi ezintathu, 2,7 million.
Ihofisi yomanyano weUnited Nations ebona ngokuphandela abaswelayo eyeOffice for the Coordination of Humanitarian Affairs (OCHA) yiyo eqale ukubika ngokukhwela kwamanani lawa ngoMbimbitho.
Umbiko lo uza ngesikhathi inhlanganiso ezisebenza lozulu zisithi umumo wendlala uya usiba mubi ngamandla elizweni, ikakhulu emaphandleni.
Ngokunjalo zithi uhulumende kanye lenhlanganiso ezifana leyeWorld Food Program (WFP) kumele baqhelise imizamo yabo yokuphandela abambayo.
Okwamanje iWFP isamise inhlelo zayo ngemva kokuphela komsebenzi eyayiwuphiwe nguhulumende owokupha abantu ukudla eziqintizi ezine ezigoqela eMangwe, Matabeleland South.
Inhlanganiso yeCare International ithi ukudula kwezinto eZimbabwe kwenza umumo wendlala ube mubi ngamandla.
Isiphathamandla senhlanganiso esebenza lozulu wemaphandleni enyakatho yeMatabeleland eyeRural Communities Empowerment Trust uMnu Vumani Ndlovu utshele iStudio 7 ukuthi umumo usumubi kakhulu.
Your browser doesn’t support HTML5
Ingxoxo loMnu Vumani Ndlovu
Sibuze isikhulumeli seWFP uMnu Christopher Charamba ukuthi bazaqala nini njalo ukwabela abantu abalambayo ukudla kodwa kakayiphenduli imibuzo yethu.