Impumela yenhlolisiso eqhutshwe zinhlanganiso ezilwela ilungelo loluntu eziphansi komanyano we Crisis in Zimbabwe Coalition, iveza ukuba umumo womnotho elizweni uqhubeka usiba mubi, kulezibonelo zokuba awuyikulungiseka kusikhatshana esifitshane esilandelayo ngoba isimo sombusazwe laso singasekeli intuthuko yomnotho.
Impumela yalenhlolisiso eye “ZimGov Barometer Research Report”, ikhomba ukuba eleZimbabwe selisiya kusibanga sokungasebenzi kuhle kwenhlangothi zonke nje zelizwe, kungakho uhulumende ekhuthazwa ukuba adinge indlela ezingaphathisa ukuletha inguquko kwezomnotho lezombusazwe.
Emhlanganweni lentathelizindaba,owenzelwe e Media Centre eHarare lamuhla ekuseni, umcubunguli obesethula limpumela, umnumzana Thulani Mswelanto, owenhlanganiso ye Crisis in Zimbabwe Coalition, uthi benze linhlolisiso ngenhloso yokubona lokuveza kuzulu ukuba uhulumende uqhuba njani.
Inhlolisiso le engeyakuqala ukwenziwa yilu manyano, uMswelanto uthi iveze isimo esibi somnotho welizwe lesombusazwe, kungela mizamo uhulumende eyenzayo ukusiguqula.
UMswelanto uveze njalo ukuba bazaqhubeka besenza inhlolisiso zaloluhlobo sikhathi sonke ngoba kungumsebenzi wenhlanganiso ezizimeleyo ukuba lilihlo likazulu, bembonisa uhulumende lapho aphosisa khona.
Umnumzana Mehluli Dube umgcinisihlalo wohlangothi lwezemidlalo lamasiko kuBoard ye Crisis in Zimbabwe Coalition, engumqondisi njalo wenhlanganiso ye Artists for Democracy Trust, uthi siyethusa isimo ilizwe elikuso.
Lumkhosi wokwethulwa kwale iReport yenhlolisiso yehlanganiso ezizimeleyo ngesimo selizwe, ungenwe zintathelizindaba ezivele enhlanganisweni ezehlukeneyo, inkokheli enhlanganisweni ezisebenza zizimele, kanye lamalunga alezinhlanganiso.