Kuhlelo lwamasiko lenhlalakahle yabantu, ngoLwesibili sihlaziye udaba lwemitshado yesivukampunzana edilika abantu besanda kuthathana. Kambe kubangelwa yini konke lokhu? Minengi imitshado edilikayo kulezinsuku eZimbabwe.
Abanye bathi kubangelwa yikugilelana imikhuba kube labanye njalo abathi akusela madombo alohlonzi elizweni.
UNkosazana Stars Thebe Mathe olwela ilungelo labesifazane loMnu. Thandeko Zinti Mnkandla ingcwethi kwamasiko esintu bathe akumnangalisi lokhu njengoba kulabanye abantwana abazitshadisa abazali bengazi lutho.
UMaThebe uthe, “Osokuhlupha emandweni ngokubona kwami luhlobo lokwenda osolukhona … ukwenda kwakhona osolwasala ibizo kodwa kungasiso simo sokwenda. Abantu bangakhulumisana emgwaqweni basomisane besebesiya lala ndawonye bavuke sebesithi sebethathene omunye ngosesithi ‘mukadzi wangu’ omunye ngosesithi ‘mukadzi wangu’.”
UMnkandla uthe lokhu kuchitha imizi esanda kwakhiwa njengoba abantu laba bayabe bengabonanga idombo lona elihlolisisa isimo semuli ezifuna ukumanyana kungakabi lomtshado.
“Indaba phela kayisukeli emendweni, umendo ungaba yisihlothi. Sona isisekelo sakhona kasikho. Uyatsho uMaThebe bangahlangana emgwaqweni okwamaviki amabili amathathu labazali kabaziswa lezihlobo kazaziswa … Isisekelo kasikho ukuthi bafundane.”
Your browser doesn’t support HTML5
Ingxoxo Esiyenze loNkosazana Stars Thebe Mathe LoMnu. Thandeko Zinti Mnkandla