Inhlanganiso ezimela izisebenzi sezisole kakhulu umphathintambo wezemali uMnu Mthuli Ncube ngokwethesa amabhizimusi labathengi imithelo emitsha zisithi lokhu kuzabulala amankampani la kuphinde kuthwalise nzima abantu abavele besidla imbuya ngoluthi.
Esethula uluhlu lwendleko zikahulumende, i-budget yomnyaka ozayo izolo, uNcube uthe kusukela mhlaka 1 ngoZibandlela ukudla okuthengiswa kuphekiwe emakhefa okufana lenyama yenkukhu, i-pizza, ama-chips, ama-doughnuts lama-burger kuzahlawulelwa umthelo we-0.5 percent.
Eminye imithelo emitsha ifakelwe amankampani asathuthukayo agoqela lawo athengisa impahla zokugqoka, izimota lezinto zokwakha.
Le yinto esolwa zinhlanganiso ezinengi ezigoqela eyababalisi iPTUZ kanye
leZCTU. Isiphathamandla seZCTU uMnu Ambrose Sibindi uthi ibudget bekungamelanga ibengeyeZiG.
Your browser doesn’t support HTML5
Ingxoxo loMnu Ambrose Sibindi.
UMnu. Mthuli Ncube wazise njalo ukuthi uhulumende usefake eceleni imali engange 813 million ZiG eqondane lokuthengela abantu abayizigidi phose eziyisitshiyangalombili, 7.9 million abalambayo ukudla ngomnyaka ozayo.
Uthi enye imali engange US$110 million izavela kunhlanganiso ezizimeleyo ezisebenzisana lohulumende ezifana leWFP.
Umbiko lo uza ngesikhathi indlala isidla ubhedu elizweni njalo ikhangelelwe ukuqhubeka ngomnyaka ozayo.
UMnu Vumani Ndlovu isiphathamandla senhlanganiso esebenza lozulu wemaphandleni eyeRural Communities Empowerment Trust uthi imali yokuphathisa uzulu ngokudla efakwe eceleni iphansi kakhulu.
Your browser doesn’t support HTML5
Ingxoxo loMnu Vumani Ndlovu.
Kusenjalo, ingcwethi zenotho zithi ukuze umnotho welizwe uthuthuke ngesilinganiso sokuyisithupha ekhulwini, i-6% njengokutshiwo ngumphathintambo wezemali uMnu Mthuli Ncube, kumele kuqale kulungiswe udubo lwamagetsi.
Eyinye yalez’ingcwethi uMnu Masimba Kuchera uthi udubo lolu
kumele lilungisiswe ngokuphangisa.
Your browser doesn’t support HTML5
Ingxoxo loMnu Masimba Kuchera.