Sekulenyanga ezingaba ngezithoba munwe munye uhlangothi oluqondisa ezemisakazo olwe Broadcasting Authority of Zimbabwe lunikeze amalayisensi kumankampani athoba minwe mibili imvumo yokusungula umsebenzi wokusakaza, kodwa munye nje kuphela umsakazo osusemoyeni okwamanje.
Amalayisensi la aphiwe kulokukhonona okukhulu kwabanye abathi kwaphiwa amankampani alobudlelwano lebandla elibusayo.
Umsakazo osuqale ukusakaza ngohamba ngegama lokuthi YA FM osakaza usedolobheni leZvishavane njalo ukhokhelwa ngowake waba ngumqondisi womsakazo we ZBC uMnumzana Munyaradzi Hwengwere.
Imisakazo le iphiwe inyanga phose ezingamatshumi amabili ukuthi ziqale ukusakaza andubana zithathelwe amalayisenzi la. Inyanga lezi zizofika ngomnyaka ozayo.
Omunye wabancitshwa ilayisensi lokusakaza ngemva kokufaka isicelo sokuthi baphiwe imvumo yokusebenza, uMnumzana John Masuku ongumsakazi odumileyo, owake wasebenzela umsakazo weZBC okwesikhathi eside, yena othi umumo wezemali yiwo ongaba usenqabela ukuqala ukusakaza kwabaphiwa amalayisensi laba.
John Masuku
“Ungakhangela khathesi amankampani amanengi seavala, ngubani ozafaka imbiko yama advert kuleyo misakazo. Imali yokuqhatsha ingcwethi ezingaba lolwazi olujulileyo lokusungula umsebenzi wokusakaza edingakalayo inengi, okulakho lakho ukuba ngesinye sezizatho zokuthi kube nzima kwabakade bezibona angani sebelungele ukusungula imisakazo”. Utshonjalo uMasuku.
Owake waba ngumgcinisihlalo wenhlangaiso elwela ilungelo lentathelizindaba, eye MISA-Zimbabwe, uNjabulo Ncube yena uthi abaphiwa amalayisensi ngabasekeli bebandla leZanu PF njalo ukuphuza kwabo ukuqalisa umsebenzi yikuthi bacela imvumo bengakazilungiseleli okugcweleyo.
Intathelizindaba uNjabulo Ncube
“Umumo wezenotho eZimbabwe okwamanje, kawukalungeli ukuthi kube lemisakazo eminengi elakho ukuthi isebenze okuzwayo ithola inzuzo, njalo layo imali vele kayikho elizweni” utsho uNcube.