Abasakhulayo beZanu PF ngoMgqibelo basole iStudio 7 leminye imisakazo efana loweBBC, oweCNN kanye labamaphephandaba azimeleyo besithi yibo abenza ukuthi izijeziso zenotho zingasuswa ngoba bebika indaba zamanga ngokwenzakalayo eZimbabwe.
Abasakhulayo laba baveze linsolo kumbuthano abawenzele eRainbow Hotel koBulawayo phambilini kosuku lweAnti-Sanctions Day ngeSonto.
Lolusuku lwahlelwa ngumanyano weSadc ukuthi lube lilanga lapho amazwe akulumanyano abambana khona leleZimbabwe esola izijeziso ezetheswa iziphathamandla zeZanu PF yiMelika lomanyano weEuropean Union.
Obona ngokwethulwa kwemibiko kuZanu PF uMnu Tafadzwa Mugwadi utshele umbuthano lo ukuthi imisakazo le yethula indaba zamanga phezu kokwephulwa kwamalungelo oluntu ngoba ingafuni izijeziso zesulwe.
Umhleli wephephandaba elizimeleyo eleThe Standard uMnu Kholwani Nyathi utshele iStudio 7 ukuthi okucunula iZanu PF yikuthi imisakazo lamaphephandaba azimeleyo ethula indaba zeqiniso.
Your browser doesn’t support HTML5
Ingxoxo loMnu Kholwani Nyathi
Kusenjalo, isigodlo someli weChina eHarare, sethule umbiko ngoMgqibelo sisithi izijeziso lezi zibulala uzulu weZimbabwe, ngakho kumele zesulwe.
Kodwa isigodlo someli weMelika laso sethule owaso umbiko sisithi izijeziso ziqondiswe kumalunga eZanu PF ephatheka kundaba zokwephula amalungelo oluntu, imisebenzi yenkohlakalo lokunye okuphathelane lombuso omubi njalo aziphazamisi abantu makhaza.
La ngamazwi agcizelelwe yisigodlo somanyano weEuropean Union. UMongameli Emmerson Mnangaggwa yena ukhangelelwe ukwethula umbiko wokusola izijeziso lezi ngeSonto.