Imidlalo yenguqu kusigaba se Castle Premier Soccer League ingena kuviki yetshumi lathoba minwe mbili kulimpelaviki iqembu le Highlanders libhekane lenkinga yokuba labadlali balo abalimeleyo ikanti abanye baphandle kwelizwe.
Intathelizindaba yethu yezemidlalo uJoseph Njanji usipha loludaba ngokugcweleyo.
Ekhuluma lentathelizindaba zemidlalo ngoLwesine umqeqetshi weqembu le Highlanders uBongani Mafu uthe iqembu lakhe libhekane lenkinga yokuba kulabadlali abambalwa abangasoze bephatheke kumdlalo waleliqembu lele How Mine ngeSonto kungenxa yezizatho ezitshiyeneyo.
UMafu uthe abadlali abathi u King Nadolo kanye lo Honest Moyo kabasoze bedlale ngoba bejeziswe yinhlanganiso ye PSL ngemva kokutholakala ukuba sebetshengiswe ikhasi lombala olithanga kathathu ngabonompembe kumidlalo eyedluleyo.
Uqhubekele phambili wathi imvimbi uDouglas Sibanda kezwa kuhle ikanti uErick Mudzingwa kanye lo Webster Chingodza balimele njalo bebengaphatheki ekuzilolongeni kweqembu selokhu kuqale liviki kuthi uTeenage Hadebe yena uselizweni le South Africa lapho azama khona inhlanhla kuqembu le Ajax Cape Town.
Umdlali wenkabeni yenkundla uEdmore Muzanenhamo yena ubikwa ehambe leqembu le Zimbabwe Prison Services lapho aqhatshwe khona lona eliphatheka kumidlalo yezinhlanganiso ezifanayo ezamazwe angomakhelwane eqhutshelwa elizweni le Botswana.
Kusenjalo abagadli abathi uKnox Mutizwa kanye lo Gabriel Nyoni balakho ukuphatheka kulumdlalo ngoba sebesizwa ngcono njengoba labo bebelimele.
Amaqembu la adibana kungensuku ngaki engqikilane kumncintiswano wenkezo ye Chibuku Super Cup lapho iqembu le How Mine elinqobe khona ele Highlanders 4 -3 ngemva kokutshaywa kwembekwa.
Iqembu le Highlanders lihlezi kundawo yethoba munwe munye engalaneni yemiklomelo njalo u Mafu uthi lesisimo kuzamele besilungisise.
Eminye imidlalo ye PSL ekhona kulimpelaviki izadlalwa ngokulandelayo; NgoMgqibelo iqembu le Harare City lizadlala lele Dongo Sawmill enkundleni ye Rufaro, iqembu le Chicken Inn lizemukela ele Chapungu enkundleni ye Luveve, iqembu le FC Platinum lizatshayana lele Hwange enkundleni ye Mandava, iqembu le Tsholotsho lizangqikilana lele Triangle United ngase White City kuthi iqembu le Flame Lily lizadlala lele Caps United ngase Lafarge.
NgeSonto iqembu le Whawha lizadibana lele Buffaloes ngase Ascot kuthi iqembu le Dynamos lizadlala lele ZPC Kariba enkundleni ye Rufaro.
Sikhangele umdlalo we rugby; iqembu elimela ilizwe emdlalweni we rugby kusasa lizadibana leqembu elimela ilizwe le Namibia khonale kwele Namibia emdlalweni wokudinga intshantshu zezwekazi lase Africa.
Iqembu le Zimbabwe lingena kulumdlalo lidinga ukuphindisela ukuvinjelwa ukuyadlala kumidlalo yezizwe zomhlaba ezadlalwa lonyaka ngemva kokutshaywa liqembu le Namibia nyakenye kodwa imizamo yalo ingaphazamiswa yikuba amalungiselelo alo abengamanga kuhle imbangela kuyikuswelakala kwemali.
Inhlanganiso ye Zimbabwe Rugby Union kayenelisanga ukuba leliqembu lilungiselele lihlezi ndawonye njalo abadlali abenelise ukuba enkambeni yilabo abangahlali esigodlweni iHarare kuthi labo abahlala eHarare bebezilolonga besuka ezindlini zangakubo.
Your browser doesn’t support HTML5
Udaba Silwethulelwa nguJoseph Njanji