Imidlalo yenguqu eyesigaba se Castle Lager Premier Soccer League iqhubekela phambili kulimpelaviki ngemva kokudedela iqembu labaleminyaka engaphansi kwamatshumi amabili lantathu elimela ilizwe emdlalweni wenguqu lona ebelidlala lelabosowabo elimela ilizwe le South Africa ngempelaviki edluleyo.
Umdlalo ozakuba phakathi kweqembu le Highlanders lele Dynamos enkundleni ye Barbourfields ngeSonto yiwo okhangelelwe ngabalandeli bomdlalo wenguqu abanengi kulimpelaviki.
Iqembu le Highlanders lileminyaka eyithoba minwe mbili lisehluleka ukunqoba iqembu le Dynamos kumncintiswano weligi yikho abalandeli bomdlalo wenguqu balinde ngamehlo abomvu ukubona ukuba kuyozalwa nkomoni eMagumeni ngeSonto.
Imidlalo yeviki letshumi lesikhombisa iyaqala ngoMgqibelo kodwa lapho iqembu le Flame Lily elizemukela khona ele Tsholotsho enkundleni yeLafarge.
Ngosuku olufanayo iqembu le ZPC Kariba lizadibana lele Triangle enkundleni ye Nyamhunga kuthi iqembu le Chapungu lizahlangana leqembu le Whawha enkundleni ye Ascot.
Umqeqetshi weqembu le Tsholotsho uLizwe Sweswe uthi ukhangelele ukuba baphenduke lempumela enhle esigodlweni iHarare ngoMgqibelo.
Kweminye imidlalo ezadlalwa ngeSonto iqembu elihlezi ngaphansi kwengalane yemiklomelo ele Dongo Sawmills lizadlala leqembu le Chicken Inn enkundleni ye Vengere kuthi ngaseMalahleni kuyabe kudibene amaqembu ezimbamgodi lapho iHwange isemukela iqembu le How Mine.
Iqembu le Buffaloes lizangqikilana leqembu le FC Platinum enkundleni ye Sakubva kuthi esigodlweni iHarare kuyabe kuhlangene amaqembu amabuili aphum akulelodolobho athi ele Caps United kanye lele Harare City.
..............................................
Sikhangele umdlalo kakhilikithi;
Umncintiswano walonyaka owemidlalo kakhilikithi ebizwa ngokuthi yi Baines Junior Dumisani Mankunzini Winter Cricket Festival uqale namhla edolobheni lako Bulawayo njalo ukhangelelwe ukuba ufike emaphethelweni ngeSonto.
Kulamaqembu angamatshumi amabili aphatheka kulimidlalo njalo lawa ngahlanganisela amaqembu amela izikolo ezitshiyeneyo ezemfundo ye primary ezitholakala khona edolobheni lako Bulawayo kanye lamaqembu amanyiweyo aphuma ko Bulawayo, esigodlweni iHarare, eBotswana kanye lase South Africa.
Iqembu elimela isikolo se Mtshingwe yilo eliphakamise inkezo nyakenye.
Lumncintiswano usungulwe ngomnyaka ka 2012 lapho ongenwe khona ngamaqembu amane njalo okunqobe khona isikolo se Baines Junior kwathi ngomnyaka ka 2013 kunqobe isikolo se Milton Junior ikanti nyakenye kunqobe iqembu elimela isikolo seMtshingwe Primary School.