Imuli yentathelizindaba uItai Dzamara obikwa wathunjwa ngabantu abangaziwayo ngoMvulo odluleyo itshele intathelizindaba emhlanganweni eHarare ukuthi ilokhu ingakwazi ukuthi uDzamara ungaphi njalo ilokhu ikhuthaza ukuthi adingisiswe.
UMnu. Charles Nyoni, omunye owayesebeza loDzamara, yena obesemhlanganweni walamuhla, uthi umnewabo kaDzamara uPatson ubechasisa imbono yemuli yakhe ngaloludaba, lapho achaze ukuthi amahunga-hunga amanengi aphuma ebulenjini athi uDzamara uyaphila awasoqiniso. .
UDzamara wazakala ngokutshengisela eHarare ekhuthaza umongameli Mugabe ukuthi atshiye umbuso ngoba esehlulekile ukuvuselela umnotho welizwe.
Umthethwandababa waphezulu owe High Court usanda ukunquma ukuthi amapholisa aqinise ukudingisisa ngokunyamalala kuka Dzamara, njalo azise umthethwandaba lo kabili ngeviki ngomsebenzi wabo kulodaba.
Amabandla ezombusazwe kanye lenhlanganiso ezizimeleyo asechothoze ukuthunjwa kukaDzamara, njalo ethesa uhulumende umlandu.
UMnu. Nyoni utshele uSithandekile Mhlanga weStudio 7 ukuthi ngoLwesibili bazafola ezitaladini babele abantu imifanekiso kaDzamara, ngendlela yokuncedisa ukumdinga. Uchasise okunengi ngomhlangano wangoMvulo.
Your browser doesn’t support HTML5
Ingxoxo LoMnu. Charles Nyoni
Inhlanganiso ezilwela amalungelo oluntu eBhilithane zitshengisele esigodlweni seZimbabwe kulelolizwe izolo, zikhuthaza ukuthi uhulumende aqinise imizamo yokudingisisa ukuthi uDzamara ungaphi.