Abehofisi yommeli weMelika eZimbabwe bathi bakhathazekile ngokwanda kwezehlakalo zodlakela lwezombusazwe elizweni, bekhuthaza abezombusazwe ukuba bahloniphe imithetho yelizwe kuphathise ukulondoloza ukuthula, ukuphathwa ngokufanayo komuntu wonke nxa ewonile kungakhathalakile ukuthi ngowaliphi ibandla.
Embikweni wabo owethulwe ngabe hofisi ebona ngezokukhulumisana lozulu, abehofisi le bathi izehlakalo zodlakela lokwethuselwa kukazulu asiyonto ekhangelelwe elizweni elithi lilandela umbuso wentando kazulu.
UMnumzana Sizani Weza, osebenza kuhlangothi lwezokukhulumisana kwalehofisi lozulu olwe Public Affairs Section, utshele intathelizindaba ukuba sebekunanzelele ukuba sezisanda lezi zehlakalo.
Kumqoka ukuba abezomthetho baqhube umsebenzi wabo ngemfanelo, bajeziswe kalukhuni labo abaphatheka kulezi zehlakalo kuveza uWeza.
UMnumzana Patrick Nkala yisakhamuzi semzini we Epworth e Harare. UNkala utshengise ukukhathazeka laye ngokwanda kwalezi zehlakalo zodlakela lwezombusazwe lokulwisana phakathi kwamalunga amabandla alemibono ehlukeneyo lawebandla linye.
Kumavhiki amabili edluleyo kube lokwanda kwalezi zehlakalo ikakhulu eHarare, lapho okube lokulwisana kwabalandeli bamabandla aphikisayo, ontanga beZanu PF beye phazamisa umhlangano weMDC-T, emzini we Hopely e Harare South.
Kuthi ngempelavhiki kube lesinye njalo isehlakalo sokubulawa kwamalunga amabili eZanuP PF, beganyulwa ngehloka ngomunye wabo kubangwa izikhundla emzini we Manyame Park, eSt. Marys, eChitungwiza.