Udaba lwecala eletheswa ibandla leMDC elikhokhelwa ngumnumzana Morgan Tsvangirai ngamanye amankampani athungayo koBulawayo lingene emthethwandaba ngoLwesithathu, lapho lelibandla elibikwa lathatha impahla ebiza izigidi phose ezinhlanu zamarand-R4,9, ngomnyaka ka 2008 kodwa lehluleka ukubhadala kuze kube lalamhla lokhu.
Ukudonselana lokhu kwaqala ngomnyaka ka2008 ngemva kokuba amankampani la, iCabat Trade and Finance leSecurity Mills, enze impahla ebiza amarand phose izigidi ezinhlanu – R 4 965 723. Limpahla eyayigoqela izikipa, amaqhiye kanye lamalembu okuthandela, enziwa ngemva kokuthi abamnumzana uEddie Cross lo Simon Spooner baqhatshe amankampani la besithi bamele lelibandla leMDC T. Amankampani le athi enza impahla yonke njengesivumelwano, lebandla leli lathumela abantu bokuzoyithatha kodwa kuthe sekumele libhadale lemba phansi okwenza udaba lolu lucine solusemthethwandaba.
Ekuzivikeleni, ibandla leMDC-T lithi lona abanumzana uCross loSpooner bazenzela lesi sivumelwano bengamelanga ibandla ngoba aluba kwakulibandla nga kulesivumelwano esilotshwe phansi. Phezu kwalokhu ibandla leli lithi isivumelwano lesi sasingekho emthethweni ngoba kungani kwakukhulunywa ngemali yakwele Zansi Africa lona ilizwe lalilokhu lisasebenzisa imali yakuleli.
Udaba lolu luke lwalahlelwa khatshana ngumthethwandaba lo kwathi ophezulu oweSupreme Court wathi kalubuyiselwe luyethethwa kudingisiswe iqiniso.
Igqwetha lebandla leMDC T uMnumzana Douglas Mwonzora, uthi kabalivumi icala abaletheswayo ngoba abanumzana laba babengamelanga ibandla labo. Lokhu okwenziwayo uthi yimizamo nje yokungcolisa igama labo ngokubaninda ngodaka kuphela okuyikho okwenza bazimisele ukumelana lalelicala emthethwandaba.
Igqwetha lamankampani la, uAdvocate Richard Fitches, yena ophathiswa ngu Mnumzana Pineas Madzivire, uthi ulesiqiniseko sokuthi impahla yabo yathathwa yilelibandla kungakho kumele libhadale.Inkampani ye Security Mills seyaxotsha inengi lezisebenzi zayo zisuka phezu kwenkulungwane – 1 200 kwasala phezulu kwekhulu nje kuphela - 110 ethi kwabangela kakhulu yikungabhadalwa limali. Udaba lolu luyaqhubeka ngoLwesine emini.