Abenhlanganiso ezilwela ilungelo loluntu eZimbabwe zivumelene ukuba sesifikile isikhathi sokusebenzisa imbono yabantu ukululungisisa udaba lokhetho, ngenhloso yokulungisisa inkinga ilizwe elibhekane lazo, kulungiselelwa ukhetho luka 2018, hatshi ukuthembela enhlanganisweni ezifana le African Union kumbe i-SADC.
Zivumelele njalo lezi nhlanganiso phezu kokuqakatheka kokuphatheka ngokugcweleyo kuka uzulu kundlela ezingenza abasembusweni balalele izikhalazo zakhe, okubalisa ukusetshenziswa kwendlela ezisemthethweni kutshengisela ukukhonona kwazo,phezu kokwenza kwenkokheli elizweni,zilungisiswe ngokwaneleyo inkinga ilizwe zibhekane lazo,isisusa sazo kuyindaba zokhetho.
Lokhu kuphume embuthanweni womkhosi wokunanza usuku lwe Africa Day, owenzelwe eweteleni ye Holiday Inn, eHarare lamuhla ekuseni, oqoqwe yinhlanganiso yomanyano wenhlanganiso ezilwela ilungelo loluntu eye Zimbabwe Human Rights NGO Forum isebenzelana leye Zimbabwe Elections Support Network – ZESN.
Omunye wabakhulume kulomkhosi, emele inhlanganiso yamagqwetha alwela ilungelo loluntu ye Zimbabwe Lawyers for Human Rights – ZLHR, umnumzana Dzimbabwe Chimbga, uqonqosele ukuqakatheka kokudinga indlela ezivela kuzulu athi yikho okungaphathisa inhlanganiso ezifana le AU le SADC.
Okusekelwe ngumqondisi wenhlanganiso ye Election Resource Centre, umnumzana Tawanda Chimhinhi othi sizofika isikhathi sokulungisisa inkinga elokhe zihlukuluza uzulu weZimbabwe, esefuqwa yisimo.
Umqondisi we Zimbabwe Democracy Institute, uDr Pedzisai Ruhanya laye ugcizelele ukuthi kuqakathekile ukuba uzulu azinikele ekululungisiseni udaba lokhetho. Esithi inkinga ngozulu weZimbabwe, yibugwala, njalo sewazijwayeza ukukhalaza sikhathi sonke enhlanganisweni ezinjenge AU, eyeSADC lezinye zakwamanye amazwe, kulokuthi asilungisele ezinye zazo.
Umqondisi we Transparency International, unkosazana Mary Jane Samukele Ncube, uthi sekudinga izizalwane zakuleli zibeke amakhanda ndawonye zidinge indlela ezingaletha inguquko ekuqhutshweni kokhetho, atsho afuna kwenziwe kuqala okuzafuqa o-SADC le AU ukuba balalele okuphuma kuzulu.
Wengeza wathi kuqakathekile ukuba lenhlanganiso ezisebenzelana lozulu kunhlangothi ezehlukeneyo zempilo ezibalisa ezokhetho, kumele zizwisise abantu ezisebenza labo kuqala ukuthi kuyini okuyikho abakuqakathekisayo.
Waqonqosela njalo ukuba kuyadingeka ukufundisa uzulu ngobudlelwano obukhona phezu kokwenzakala elizweni lendlela ukhetho oluqhutshwa ngayo.
Abenhlanganiso lezi bavumelene ukuba kuqakathekile ukusebenzelana lozulu ukuze azwisise ukuthi kumele aphatheke kunhlelo eziletha inguquko elizweni ngendlela yokhetho.
Izizalwane zeZimbabwe zona zikhuthazwa ukuba zehlukane lomkhuba wokubalekela inhlupho zazo, zithembele kwamanye amazwe kanye lenhlangiso zomhlaba ukulungisisa inkinga eziselizweni, ngoba kukulutshwana lezinhlanganiso ezingakwenza.