Impilo kaMnu JD Vance, umsekeli walowo oncintisa kukhetho lukaMongameli waseMelika emele ibandla lamaRepublicans, iludaba oluvamileyo lomuntu ophumeleleyo othakazelelwa ngabantu besigaba sakhe.
UVance wakhulela eAppalachia, wafunda esikolo sohlonzi lwaphezulu eseIvy League, futhi ulakho ukuba ngumsekeli kaMongameli wakuqala embalini yeMelika oleminyaka yokuzalwa ephansi.
Siqale ngembali yakhe kudaba esilulotshelwe yintathelizindaba yeVOA News uCarolyn Presutti:
Ayisikho lapha azalelwa khona. Kodwa eJackson, Kentucky, kulapho uJD Vance athi sokulikhaya lakhe.
Kutsho uVance, “Ngathi ngicela umtshado kumkami ngathi, ‘Sithandwa, ngiza lesikwelede senkulungwane zamadola ezilikhulu elilamatshumi amabili, US$120,000 engasithola ngifundela ezemithetho esikolo kanye lendawo yamathuna duzane lentaba empumalanga yeKentucky.”
Emathuneni la, omkhulu wamapholisa esigabeni seBreathitt, eKentucky, uSheriff John Hollan, uchasise wathi: NguGogo Bonnie Blanton Vance."
Election 2024 Debate
Ugogo kaVance wayesaziwa ngokuthi nguMamaw.
“UVance wayehlala ebuya lapha logogo wakhe. Wayesiza laye ezintabeni ezomtshengisa ukuthi impilo injani ezintabeni, kusobala ukuthi wayekuthakazelela," kutsho uSheriff.
Wazalelwa lapha eMiddletown, esabelweni seOhio, wakhuliswa ngugogo wakhe owayethukana kakhulu, owayegcina imibhobho engamatshumi phose amabili, 19, endlini yakhe eyayihlala ikhokhile.
Esebenzisa isibongo sikababa owayethethe unina ongamzaliyo elithi JD Hamel, wanqoba kukhetho ancintisa kulo okwakuqala, olokuba ngumsekeli kaMongameli wekilasi yesikolo sakhe Middletown High School.
Waba libutho wasesiya ekolitshini leOhio State University lapho aphothula khona engomunye wabafundi abahamba phambili.
Esuka lapho uVance waya ekolitshini leYale, lapho azwanana khona lomunye umfundi owayeqhuba ezemithetho uUsha Chilukuri – owacina esengunkosikazi wakhe.
Owayengumngane wababili laba befunda bonke uJames Eimers ubazi kahle: “Ngicabanga ukuthi nguye owenza uVance waphuma lesinqumo sokuthi enzeni kahle-kahle ukuze acande ikusasa lakhe esikolo sezemithetho.”
UVance wazakale elizweni lonke ngo2016 ngemva kokwethula ifilimu elesihloko esithi ‘Hillbilly Elegy’, eyayigxile ogwalweni ayelulobile olwaluhamba phambili olwalukhuluma ngezimuli zeMelika ezenza imisebenzi eleholo eliphansi.
Owayelingisa ugogo kaJD Vance kufilimu le nguGlenn Close.
“Kodwa kumele ukhethe ukuthi ufuna ukuba ngumuntu kumbe cha?” kutsho uClose kulifilimu.
Ngosekelo ayeluphiwe ngowake waba nguMongameli uMnu Donald Trump, uJD Vance — umfana weOhio othanda iKentucky — wakhethwa ukuba nguSenator waseOhi. Duku duku ngemva kweminyaka emibili, uJD Vance usekukhetho lomsekeli kaMongameli weMelika omutsha.
Republican and Democratic supporters outside of the CBS Broadcast Center
UTrump wakhetha uVance kodwa akumqalelanga kuhle ngoba wayeke wachothoza uTrump esithi ungumuntu omubi kakhulu futhi wafunga ukuthi akasoze afa amsekela.”
Kodwa njengoba uTrump esemkhethile, injongo yabo isinye. Wathi ebuzwa ukuthi uTrump wanqotshwa yini kukhetho luka2020 waphendula esithi, “Cha, ngicabanga ukuthi kwaba lamaphutha amanengi ngo2020. Ukuthi uTrump wanqotshwa yini kulolokhetho, ayisiwo mazwi engingawasebenzisa lawo.”
UVance ulembono eqinileyo ngeChina leEast Asia futhi usola uhlelo lokuphathisa eleUkraine ngezikhali zempi.
Nangu ephendula umbuzo ngempi yeIsrael leHamas, “UKamala Harris, ngakwesinye isandla, uthi uyabakhathalela abantu makhaza abafela kulimpi. Kowa uyala ukunika eleIsrael izikhali ezizaphephisa abantu abanengi.”
Idolobho likaVance eleMiddletown lisekela uTrump kabanzi. USteve Dillman waqhatsha uVance asaleminyaka yokuzalwa elitshumi lasithupha, 16.
“Ngiyaziqhenya kakhulu ngalokho akufezileyo, futhi ukuba yingxenye yalokho kungenza ngizizwe ngijabulile ngaphakathi. Le yindoda evela kuMcKinley Street futhi manje ilakho ukuba ngumsekeli kaMongameli weMelika,” kutsho uMnu Steve Dillman.
Engakhethwa, uVance oleminyaka engamatshumi amane, 40, uzakuba ngowesithathu omncane ngokuzalwa embalini yeMelika ukuba ngumsekeli kaMongameli.
Udaba lolu silulotshelwe yintathelizindaba yeVOA News uCarolyn Presutti.
Your browser doesn’t support HTML5
Udaba Silwethulelwa nguNtungamili Nkomo