Udubo lokusilela kwemali emabhanga ikakhulu idola leMelika, ukuqansa njalo nje kwentengo yemphahla, ukudla lamafutha ezimota kuqhubekela phambili ngamandla ko Bulawayo osokuthwalise abantu nzima ilizwe lonke.
Abathengisa imali emigwaqweni okungekho emthethweni, oSiphatheleni labo bakhweza intengo yokuthenga idola leMelika, okokuthi nsuku zonke lintengo iyabe ikhuphuka.
Indwendwe zezimota ezidinga amafutha ezimota ziqhubekela phambili edolobheni lakoBulawayo kuhlangene lendwendwe zokudinga imali emabhanga lapho abantu abaphiwa khona imali yamatshe engaphansi kwekhulu lamadola ngeviki.
UMnu Mandla Tshuma isakhamuzi sakoBulawayo usola kakhulu ukuba imali itholakala emikambo yensitha ngoba emabhanga ingekho kanye lokuqansa kwentengo yemphahla lokudla emavinkilini.
“Ukusilela kwemali lamafutha ezimota lokuqansa kwentengo yokudla emavinkilini sekusitshiye ebunzimeni emabhanga akulamali kuthi lentengo yempahla isikhuphukile. Kungabakuhle ukuba uhuluemende angenele alungisise loludubo lwemali yamabond.”
UNkosikazi Sanelisiwe Hadebe laye uhlaba omkhulu ukhosi ngokuqansa kwentengo yempahla lokudla ezitolo kanye lokusilela kwemali.
"Kulezi insuku sidonsa nzima asilali sikhathazeke okuphezu kwamandla ethu, intengo yempahla isiphezulu okwamagama njalo lemali iyasilela ayikho emabhanga"
UMnu. Lovemore Moyo okumsebenzi wokuthengisa amaluba koBulawayo uthi ibhizimusi idonsa nzima ngalezi nsuku.
“Ngikubhizimusi lokuthengisa amaluba, ibhizimusi imbi kulezi insuku, abantu babuya bethwele ibond, izinto ziqansile idola alitholakali kabakhuphe ibond ngoba selisibulalele ibhizimusi. Sicela uhulumende angenele akhuphe imali yebond ngoba isibulele umnotho welizwe. "
Isimo somnotho simi manzonzo ezweni, amabhanga awalamali, abamavinkili amanengi sebesala ukwamukela imali yohlobo lweBond Note bethi bafuna idola leMelika, uma ungelalo uhlawula okuphethwe kane kumbe kahlanu intengo yedola ngebond, osekutshiye abantu bedideke ingqondo.
Amafutha ezimota lawo aqhubekela phambili esilela inengi seliphephela emikambo yensitha.
Uhulumende uhlala ethembisa ukuba udubo lokusilela kwemali, amafutha ezimotha lokuqansa kwentengo yempahla kuzalunga kodwa uzulu uqhubekela phambili ebhekane lendubo lezi.
Edolobheni lakoBulawayo, amapholisa avuke ememezela NgoMvulo ekhuthaza abantu ukuba baye emsebenzini lakumabhizimusi abo besithi kungamanga ukuba kuzakuba lokutshengisela into yakuqala edolobheni laKoBulawayo ukuba kubelesimemezelo samapholisa ekhuthaza uZulu ukuya emsebenzini.
Amapholisa lawa abehamba ebhodabhoda ememezela ngeloud speaker ukuthi abantu benganaki ukutshengisela kokungayi emsebenzini okubizelwa ngabanye.
Your browser doesn’t support HTML5
Udaba lokuqonga kwentengo yemphahla lokudla siluphiwa nguAnnahstacia Ndlovu