Ibandla le Zanu PF libikwa seliqalisile ukulungiselela idili lokunanza ilanga lokuzalwa kukamongameli Robert Mugabe ngenyanga ezayo kusetshenziswa imali ibikwa ingafika phose inkulungwane zamadola ezingamakhulu ayithoba minwe mibili, $800 000.
Lokhu sekucunule abanengi abathi ngabe imali esetshenziswa edilini isetshenziswe ukuphathisa abaswelayo.
Lelidili elokunanza ukufikisa iminyaka engamatshumi ayithoba minwe mbili lambili.
Leli dili elaziwa ngokuthi yi 21st February Movement, lenziwa kanye ngomnyaka. Ngomnyaka odluleyo lumbuthano wenzelwe edolobheni le Victoria Falls.
Ilunga leZanu PF kudale le central committee uMnu. Joseph Tshuma utshele iStudio Seven ukuthi uzulu engakhathazwa yikuthi imali ngoba ikhokwa nguzulu ngesihle.
“Lilanga eliqakatheke kakhulu embalini yomuntu. Wonke umuntu uyalithakazelela ilanga lokuzalwa kwakhe phoke elikamongameli wethu liqakathekile kakhulu,” kutsho uTshuma.
Wengezelele esithi abathi nga imali ezasetshenziswa emkhosini lo isetshenziswe ukupha abaswelayo uTshuma uthe : “Ama program okuphathisa abahluphekayo akhona ngoba kule Ministry ye public and social welfare. Angiboni ukuthi kumele sikuhlanganise lokho lokunanza ilanga lokuzalwa kukamongameli.”
Your browser doesn’t support HTML5
Ingxoxo loMnu. Joseph Tshuma
Siphinde saxoxa loNkosazana Thabitha Khumalo umsekeli wesikhulumeli sebandla leMDC-T othi kuyamangalisa ukuthi ibandla leZanu PF lingasebenzisa imali enengi kangaka edilini uzulu esidla ingqweqwe zomlomo.
“Thina njengebandla elikhokhelwa nguMnu. Morgan Tsvangirai kuyasidinisa njalo kuyadaka ukuthi abantu abadala ababusayo abaselizweni … abantu badla imbuya ngoluthi bona badinga lemali yokucelebreta ibirthday yomuntu oselimnyaka engu 92,” kutsho uKhumalo.
Lumbuthano wenziwa edolobheni le Masvingo lona elingelinye leziqinti zelizwe ezilendlala embi kakhulu.
Nyakenye wenzelwa edolobheni le Victoria Falls.
“Abantu babluwa yindlala, amacivil servants kawaholanga, ezibhedlela akula mithi, izikolo abantwana sebexotshiwe. Kambe shuwa ungaba ngumkhokheli onjani othi ngapha abanye abantu bayakhala kufiwe wena uyagida unatha okubabayo ukuthi uthabise umzimba wakho wena wedwa?” kutsho uKhumalo.
Your browser doesn’t support HTML5
Ingxoxo loNkosazana Thabitha Khumalo