EleZimbabwe lalo limanyana lomhlaba ekuqaleni amalungiselelo aleli langa, lobanje ilizwe ligalula phakathi kwenhlupho ezidalwa yikungamanga kuhle kwesimo somnotho. Ungathengela yini isithandwa sakho amaluba endlini umangoye elele eziko?
Abathengisa amaluba koBulawayo
Umnotho welizwe umangobongo inengi labantu abalamsebenzi ongabapha imali ngesikhathi kuthi abayitholayo kubanzima ukuba bayithole emabhanga osekubangele ukudambisa amalungiselelo elanga leValentines Day.
UMnini wevinkili elithengisa imithi lokutshiyeneyo, uNkosikazi Lorraine Hadebe, uthi waqala ukulungiselela lelilanga NgoZibandlela ethi abantu bayathenga kodwa akufanani leminyaka edluleyo ethi bakhangelele ukuba lebhizimusi.
Evumelana loMaHadebe, uMnunzna Lovemore Moyo othengisa amaluba uthi ibhizimusi liphansi kakhulu njalo lonyaka kunzima ngoba ngalesisikhathi eminyakeni edluleyo uyabe eselabathengi ababhukhise amaluba amakhulu.
Abathengisa amaluba koBulawayo
UMnunzana Thembani Maphosa uthi yena umuntu wakhe umthanda malanga wonke kodwa kulabo abavame ukulithakazelela lelilanga basenkingeni ngoba ilizwe alilamali ngitsho lamabhanga awaphi muntu imali ngakho imali yezipho ayikho lonyaka.
UNkosazana Lulu-Brenda Harris uthi ilanga leValentine liqakathekile ngoba livuselela uthando kodwa ukuma manzonzo kwezomnotho kuzaphazamisa abantu abanengi abavame ukulithakazelela leli langa.
Abantu bethenga amaluba koBulawayo
Ilanga leValentine lithakazelelwa NgoNhlolanja ngelanga lesitshumi lane njalo laqala emazweni aphetsheya kolwandle osokungumkhuba osulandelwa ngamazwe amanengi. KoBulawayo amavinkili ambalwa lendawo zokudlela sezilungiselele leli langa kubonakala ngombala obomvu abathi kutshengisa uthando.
Your browser doesn’t support HTML5
Udaba lwelanga leValentine's Day silethulelwa nguAnnahstacia Ndlovu