Abadabuka eZimbabwe bancoma okwenziwe yinkampani yeKings and Queens Real Funeral Services ezimisele ukuthwala umngcwabo kaSifelani Ngwenya obhubhele esibhedlela eJohannsburg lapho abengelatshwa khona ngoba ubengelamaphepha okuhlala kwele South Africa.
Umdeni wakhe wehluleke ukuba lemali yokuthwala isidumbu sakhe okumele singcwatshwe eGokwe.
UMnu. Ngqabutho Mabhena, umgcinisihlalo wenhlanganiso yeZimbabwe Community in South Africa, uthi kuyabukeka okwenziwe yinkampani le evame ukunceda abangela mali yokuthwala izidumbu zezihlobo ezibhubhele kwele South Africa.
Inkampani le yasungulwa ngabadabuka eZimbabwe abakubona kufanele ukuba bengene kubhizimusi lokungcwaba abatshonileyo ngoba babebanengi ababhubhela kwele South Africa abadabuka eZimbabwe okwakusiba nzima ukuthi izidumbu zabo zithwalelwe ekhaya.
UMabhena uthi kumele abadabuka eZimbabwe abahlala kwele South Africa bexoxisane lenkampani le bengene enhlelweni ezizabanceda bengatshona kumbe izihlobo zabo.
SEE ALSO:
Ingxoxo Esiyenze loMnu. Ngqabutho Mabhena