Ikhansili yakoBulawayo isiqalise ukuvalela izakhamizi amanzi ikakhulu kulezo ezilezikwelede lanxa lokhu kunqunywe ukuthi kwephula izimiso zesisekelo sombuso esitsha ngumthethwandaba waphezulu oweHigh Court nyakenye.
Ikhansili yakoBulawayo iqhubeka ngaloluhlelo lokuvalela abantu amanzi phakathi kokukhonona okukhulu kukazulu othi kumele izakhamizi zingavalelwa amanzi kodwa zinikwe ithuba lokuthi zibhadale lezi zikwelede kancane-kancane.
Ikhansili ithi izakhamizi seziyikweleda imali phose izigidi ezilikhulu zamadola - i$90 million ekhwele ivela kumatshumi ayisikhombisa ezigidi – i$70million umnyaka uqala nyakenye.
Umthethwandaba waphezulu owe High Court nyakenye unqume ukuthi ukuvalela izakhamizi amanzi ngenxa yezikwelede kwephula isimiso sesikelo sombuso esithi wonke umuntu ulelungelo lokuthola amanzi ahlanzekileyo.
Umnumzana Rodrick Fayayo, umqondisi wenhlanganiso yezakhamizi eye Bulawayo Progressive Residents Association, uthi bona njengenhlanganiso bakholwa ukuthi amanzi alilungelo lomuntu kungakho izakhamizi zingeke zavalelwa amanzi ngoba lokhu kufaka impilakahle kazulu engozini. Uthi loluhlelo lwenziwa yikhansili ngenkani ngoba umthethwandaba lwakhipha isinqumo sokuthi amakhansila wonke elizweni angavaleli uzulu amanzi ngenxa yezikwelede.
Isakhamuzi, uNkosikazi Rita Maphala uthi ikhansili kayisebenzise yona leyo imali enlutshwane eyitholayo ukuqhuba inhlelo ngoba izakhamizi lazo azilayo imali edingakalayo. Uthi ikhansili ingeke iqamule isinqumo somthethwandaba izenzele santando ngoba layo kumele ilandele izinqumo ezibekwa yimthethwandaba yelizwe.
NgoNkwenkwezi nyakenye umahluli womthethwandaba weHigh court uJustice Chinembiri Bhunu uthe akukho emthethweni ukuvalela izakhamizi amanzi. Wathi uSection 8 we Water By law Statutory instrument 164 of 1913 awuhambelani lesisekelo esitsha sombuso.
Ikhansili ithi ibikhangele ukuthola imali engaphezu kwezigidi ezilikhulu zamadola nyakenye - $103 million kodwa izakhamizi zabhadala itshumi lantathu lezigidi kuphela – i$13 million.