Ikhansili yakoBulawayo ingene kulanga lesibili lokuhamba ifafaza idolobho ngemithi yokubulala okungabangela imikhuhlane, ngalesi sikhathi sokulandelwa kweziqondiso zikahulumende zokwalisa abantu ukuhambahamba emizameni yokuvimba ukuthelelanwa kwegcikwane leCoronavirus.
UNkosikazi Nesisa Mpofu isikhulumi seKhansili yedolobho lakoBulawayo uchasisa kabanzi ngaloluhlelo.
''Lamuhla besiqhubeka ngohlelo lwethu lokumelana leCovid-19 sihamba sichela edolobheni njalo khona sizangena sisiya kumavinkili aphandle kwedolobho sihamba sichela ngomuthi obulala leligcikwane.''
Uhlelo lokuchela idolobho lukhangelele ukuphela NgoLwesihlanu. lkhansili ithole izigubhu ezingamatshumi amathathu ezilesisindo samatshumi amabili lanhlanu amalitre ezilomuthi we Hydrogen Peroxide kuhulumende.
Izimotha ebezifafaza amanzi alemithi yokulondoloza ukuhlanzeka koBulawayo
Ngasikhathi sinye ikhansili yakoBulawayo yazise ngokwengezelwa kwezikhathi sokwabelwa kwabantu amanzi okwensuku ezine lengxenye kuqala lamuhla.
UNkosikazi Mpofu uqhubekela phambili echasisa ngalokhu.
''Amanzi njengedolobho sesingene ku108 hours water shedding, amadamu ethu akumatshumi amathathu lambili ekhulwini njalo silamadamu amabili angasela manzi likhona njalo elinye esikhangelele ukuma ukukha khona amanzi kunyanga ezayo Sicela ukuba idolobho lilondoloze amanzi lawo eliyabe ligeze ngawo lingawasebenzisa njalo ukuthelezela izivande kumbe ukuhambisa ingcekeza ezambuzini.
KoBulawayo
Izakhamizi singayeka ukulondoloza amanzi ikhansili ibike ukuba ilakho ukukhuphula amalanga idolobho lingelamanzi.
Okwamanje idolobho lilamanzi ayisilinganiso sokungamatshumi amathathu lambili ekhulwini kulandela ukungani kahle kwezulu lonyaka.