Bathabe bamanzi te omongi ngemva kokuphiwa imali yama allowances nguhulumende, abanye bethola amadola azinkulungwane ezinhlanu $5000. Abanye bazibuza ukuthi uhulumende engabe enze lokhu ngokuthanda na kumbe yindlela yokudinga amavoti njengoba ukhetho solusondele.
Udaba lweholo lwabongi ludaba olusegudwini kuzisebenzi zikahulumende ezigoqela ababalisi labo asebevule amehlo bekhangelele ukuthi uhulumende uzabengezelela iholo labo.
Omongi bakhalale umsebenzi kunyanga edluleyo bekhonona ngokuthi uhulumende ubakweleda ezinye izimali okumele baziphiwe lapho besemsebenzini ezibalisa imbhadalo abayiphiwe lapho besebenza ebusuku.
Omongi bathole imali ezitshiyeneyo,inengi lithole inkulungwane eyodwa yamadola kwathi abanye bathola inkulungwane ezintathu kuthi amaPrimary Care Nurse wona asezakhomba ngophakathi ngemva kokuthola inkulungwane ezinhlanu zamadola.Abanye ngabakhala ezimathonsi ngoba bengatholanga lutho.
Omunye umongi othole limali ongathandanga ukuqanjwa ngebizo uthi uyamkele ngezandla zombili.
Ukubhadalwa kwabongi lokhu kuza ngesikhathi kungela mali elizweni njalo abantu belala phandle kwamabhanga bemelele ukuthola imali zabo.
Abacubungula ezombangazwe bathi uhulumende utshilwe ingalo ngabongi njalo kuzamele aphathe izisebenzi zakhe zonke okweqanda ngoba ukhetho solusondela.
UMnu Balugwe Moyo uthi inyathelo likahulumende leli lilakho ukubhidliza umumo wezomnotho.
UMoyo ugcizelele wathi uhulumende usesenkingeni ngoba zonke izisebenzi zikahulumende zizafuna iholo lazo lengezwe.
Ukubhadalwa kwezinkulungwane zamadola kubongi lokhu kuza ngesikhathi ababalisi bekhalaza ngelabo iholo.Kunyanga eyedlulileyo uhulumende wabhadala odokotela inqwaba-nqwaba yemali ngemva kokuba bekhalale umsebenzi kodwa okwamanje sebekhala ezimathonsi odokotela besithi iholo labo liphinde lehliswa.
Your browser doesn’t support HTML5
UAlbert Ncube Uyalandisa
Kusenjalo, uhulumende usethembise ukukhweza iholo lababalisi
lisuka kokulitshumi kusiya kokulitshumi lanhlanu ekhulwini 10-15%.
Inyathelo leli aliyamukelwanga kahle zinhlanganiso ezimela ababalisi.
Izikolo zivulwa kuviki eledlule, ababalisi bebethembise
ukukhalala umsebenzi kodwa bayeka ngemva kokuthenjiswa ukukhwezelwa
iholo ngokulitshumi ekhulwini. Ngemva kokukhulumisana lenhlanganiso
ezimela ababalisi, uhulumende ukhweze ngokulitshumi lanhlanu
ekhulwini inyathelo elingayamukelwanga ngababalisi bethi yimali encane
uma beqathanisa lobuyanga obubhekane lelizwe kumbe imali engaholwa
yizisebenzi zikahulumende.
UMnunzana Dube uthi bakhangelele ukuba uhulumende akhweze iholo
lezisebenzi lifike kumbe lihambelane lePoverty Datam line.
Omunye wababalisi, uNkosikazi Nomathemba Nyoni, uthi kajabuli ngenani lemali uhulumende afuna ukubapha
lona ngoba bavele bahola imali encane ebenza bahluleke ukuphila
lokusebenza kahle.
Inhlanganiso zababalisi zithi lokhe zisakhulumisana lohulumende ngoba
inani abakhuluma ngalo abavumelani lalo. Inengi lezisebenzi
zikahulumende zihola phose amakhulu amabili lengxenye, imali engeneli
ukuba umuntu osebenzayo aphile ngenxa yesimo somnotho welizwe omi
manzonzo. Abamele ababalisi kunkulumo zeholo bathi uhulumende kumele
abahloniphe njalo balakho ukukhalala umsebenzi uma kungavunyelwananga.
Your browser doesn’t support HTML5
UAnnastacia Ndlovu Uyalandisa