Abanye beZimbabwe eGaborone bathi abathokoziswa yindlela ihofisi yommeli welizwe kweleBotswana ebamba ngamandla abantu ukugcwalisa iphetshana elibuza imbuzo ngempilo zabo besithi abakwazi ukuthi uhulumende weZimbabwe ufuna ukwenzani ngakutholayo.
Abadinga uncedo ehofisini emele iZimbabwe eGaborone bazithola becelwa ukuthi baphendule imbuzo ngempilo yabo langokufika kwabo eBotswana, ukuthi balandeni.
Ihofisi yeZimbabwe ithi izama ukubuthanisa ulwazi ngalabo abaphandle kwelizwe njalo ukuthi bangancedwa njani uma kulamathuba abafaneleyo ekhaya.
Kuphepha leli, abaligcwalisayo kumele bafake amagama abo ngokugcweleyo kanye lekheli lesihlobo ekhaya, okwenza inengi lingahlaliseki libuza ukuthi uhulumende angabe ehloseni.
Umnumzana Nathaniel Moyo uthi katholi kahle ukuthi kungani uhulumende edinge indlela efana lale ukubutha ulwazi, kukanti okujayelekileyo yikuthi umuntu akumelanga azibethe ngegama.
Kukanti umnumzana Dennis Ncube uthi unanzelele ngesikhathi esiyafuna uncedo lokuthola incwadi yokuhambisa-iphasiphothi entsha- ukuthi kudingakala ukugcwalisa kwaleliphepha elibuza imbuzo engacaciyo. Ethi kodwa akubahlalisi kuhle ngoba bengazi ukuthi okubhalwa kulencwadi kuphelela ezandleni zikabani.
Iphetshana leli lidinga ukwazi ukuthi umuntu wasuka njani ekhaya, nini njalo wenza msebenzi bani elizweni akulo njalo uhlala kuphi.
Okunye okungaphathi kahle inengi ngumbuzo wokuthi uzabuyela eZimbabwe sekutheni, inengi lisesaba ukuthi ulwazi olutholakalayo lungabe lucina lusezandleni zengatsha zika hulumende ezesatshwa nguzulu.
Kodwa omunye osebenza ehofisini yeZimbabwe eGaborone utshele iStudio 7 ukuthi akulasidingo sokwesaba ngoba le yimizamo emsulwa yokubutha ulwazi njalo ngabaphuma elizweni, ngesikhathi iZimbabwe ilahlekelwa zigqondo ezikhaliphileyo zidinga emsebenzi emazweni angomakhelwane.