Uhlangothi lukahulumende olubona ngokuqhatshwa kwabezempilakahle solumise umsebenzi odokotela abangamakhulu amahlanu – 500 – abalamalanga angamatshumi amabili lane bekhalale umsebenzi bekhala ngokubhadalwa iholo ngama bond notes lama RTGS kanye lokuswelakala kwempahla yokusebenzisa ezibhedlela lokunye.
Uhlangothi lolu olweHealth Service Board lulobele udokotela munye ngamunye incwadi lusithe umiswe umsebenzi okwamalanga alitshumi lane ngenxa yokukhalala umsebenzi okungekho emthethweni.
Lokhu kulandela okwethulwe ngumthethwandaba weLabor Court othethe isinqumo sokuthi odokotela laba bakhalale umsebenzi okungekho emthethweni njalo iHealth Service Board ilakho ukubaxotsha umsebenzi, ukungabaholisi imali yesikhathi bekhalale umsebenzi njalo lokwenza konke ekufisayo.
Kubikwa ukuthi uhlangothi lolu luzama ukuqhatsha odokotela abasanda kuphetha izifundo zabo.
Kasenelisanga ukukhuluma leziphathamandla zohlangothi lolu, umphathintambo wezempilakahle uDokotela Obadiah Moyo kanye lomsekeli kamongameli uRetired General Constantino Chiwenga, obephethe udaba lwabodokotela abakhalale umsebenzi.
Omele odokotela, uDokotela Mthabisi Bhebhe, unobhala jikelele wenhlanganiso yabodokotela eyeZimbabwe Hospital Doctors’ Association, uthi akumangalisi okwenziwe yiHealth Service Board.
Your browser doesn’t support HTML5
Ingxoxo Esiyenze LoDokotela Mthabisi Bhebhe