I-Israel ngoMvulo ikhuthaze abantu abahlala kwelinye lamadolobho amakhulu asesihlengeni seGaza ukuthi basuke kulindawo ngesikhathi ibutho layo lihlasela lidinga abebutho leHamas.
Laloba i-Israel isithumele imibiko eminengi ixwayisa abantu ukuthi baphume endaweni ehlasela kuzo, abanye bayayisola besithi imibiko le ayifiki ebantwini njengoba indawo ezinengi zingasela magetsi kanye le-inthanethi okwenza abanengi bengafinyeleli limibiko.
IGermany ngoMvulo ithe ikhangelele ukuthi i-Israel ingazisi abantu kuphela kodwa ibone ukuthi kulendawo ezivikelekileyo lapho abantu abangaya kuzo.
Inhlanganiso yomanyano wamazwe eyeUN ixwayise ngomumo oseGaza isithi kulabantu abangaba yisilinganiso sokungamatshumi ayisitshiyangalombili ekhulwini abalahlekelwa yimizi yabo njalo abanye behlala endaweni eziminyeneyo.
I-Israel yazise ukuthi kulamasotsha ayo amathathu afileyo.
Uhlangothi lwezempilakahle eGaza olukhokhelwa yiHamas luthi amaPhalestina angamakhulu amathathu asebulewe kusukisela ngesikhathi impi iqala kutsha kulandela iviki yokuthula, kusengeza inani labafileyo eGaza kulimpi. Inani leli selisedlula inkulungwane ezilitshumi lanhlanu (15,200) kulabantu abedlula inkulungwane ezingamatshumi amane abalimeleyo (40 000).
Ekhuluma leStudio7 uSheikh Bilal Gwenzi, omunye wabakhokheli bokholo lwesi-Islam koBulawayo, ephansi kwenhlanganiso yeSupreme Council of Islamic Affairs in Zimbabwe ukhuthaze ukuthi kube lokuthula.
Your browser doesn’t support HTML5
Ingxoxo loSheikh Bilal Gwenzi.
Studio7 ixoxe njalo loMfundisi Chris Dube owebandla le Family of God Church ese Filabusi okhuthaze amacele omabili ukuthi aqakathekise impilo kazulu.
Your browser doesn’t support HTML5
Ingxoxo loMfundisi Chris Ndlovu.