IHamas isikhulule abantu abathathu eyabathumba ngomnyaka ka2023 kweleIsrael lapho eyabulala abedlula inkulungwane phose lengxenye – 1,200.
Lokhu kulandela isivumelwano leleIsrael sokubeka phansi izikhali njalo lokukhululwa abathunjwayo labavalelwe entilongweni ngeleIsrael. Abezindaba abeReuters babika ukuba abakhululwe yiHamas nguRomi Gonen, 24, Emily Damari, 28, loDoron Steinbrecher, 31.
EleIsrael lona likhulule amaPalastina afika phose ikhulu – 90. Bagoqela uMahmoud Aliowat, 15, uKhalida Jarrar, 62, okunhlanganiso yePopular Front for the Liberation of Palestine, Dalal Khaseeb, 53, udadewabo womunye wababekhokhela iHamas uSaleh Arouri, owabulawa ngeleIsraelo ngoZibandlela eBeirut nyakenye.
Omunye njalo nguAbla Abdelrasoul, 68, ikhosikazi lika Ahmad Saadat, laye okunhlanganiso yePopular Front for the Liberation of Palestine.
Kukhangelelwe ukuba kuzakhululwa abathunjwa yiHamas abangamatshumi amathathu lantathu – 33 phakathi kwamaviki ayisithupha. eleIsrael lona lizakhulula amaPalastina azinkulungwane ezimbili – 2,000.
Okwamanje uhlangothi lweGaza olubona ngezempilakahle luthi abantu abedlula inkulungwane ezingamatshumi amane – 42,000 sebabulawa ngeleIsrael kusukela ngoMfumfu ngomnyaka ka2023.