Kulehlekana labalandeli bebandla leZanu PF abazibiza ngokuthi yiGeneration 40 abakhanya bekhokhelwa nguMnu. Saviour Kasukuwere umqondisi wehlelo zombusazwe kuZanu PF asebezimisamisa bedinga ozangena esikhundleni sikaMongameli Robert Mugabe engasitshiya.
Kukhanya leli qembu labantu lingafuni ukuthi umsekeli wakhe uMnu. Emmerson Mnangagwa abe nguye ozasithatha. UMugabe kukhanya kuliqinga lakhe lokuthi akulamuntu azamnika ubukhosi lobanje kusobala ukuthi ukuluphala kwakhe kwenza kubelokuxokozela ebandleni leli. Kambe ingenzani iGeneration 40 le?
Inkokheli yeZanu PF iyavuma ukuthi iGeneration 40 ikhona ebandleni loba belemibono etshiyeneyo ngamandla ayo yokudinga ozathatha isikhundla sikaMugabe nxa engasekho kiso.
Ababizwa ngokuthi yiG40, ibizo elivela kulungelo labo elikusisekelo sombuso welizwe lokuthi bangangena kukhetho lukamongameli, bakhanya besebenzisa uNkosikazi Grace Mugabe ukuthi bathole ukwenza santando.
IG40 le ilabantu ababalisa uKasukuwere, uProfessor Jonathan Moyo, uPhillip Chiyangwa labanye abazonda uMnangagwa abathi angeke anqobe kukhetho lukamongameli njengoba ecatshangelwa ukuthi wayengomunye wabatshotshezela umbhuqazwe weGukurahundi owabulalisa abantu abanengi eMatabeleland le Midlands.
Omunye walabo ozwa kuthiwa iG40 idla njengempehlane kubandla leli nguMnu. David Ndlovu, okudale leCentral Committee kubandla leli. Uthi benza njengabathengisi ababulalisa abantu abanengi ngesikhathi sempi yenkululeko.
Your browser doesn’t support HTML5
Udaba Esilwethulelwe NguGibbs Dube
UNdlovu uthi akukhanyi ukuthi abantu laba balamandla okuguqula okwenzakala kuZanu PF.
Abanye njalo abanjengo Mnu. Tamuka Nyoni umsekeli weZanu PF uthi akuqedakali ukuthi iG40 iyisimo bani.
Uphinde wathi okusobala yikuthi kuzalandelwa imithetho yelizwe leye Zanu PF ukukhetha inkokheli ezizothatha izikhundla zaphezulu okugoqela ozakhethwa nxa uMugabe engehlelwa yingozi.
Ingcwethi kwezombusazwe ezimele yodwa, uMnu. Mlamuli Nkomo, uthi akukaveli sobala okwenziwa yiG40.
Kukhanya engani iGeneration 40 isakhona njalo ilakho ukuthwala nzima ekuzameni ukuguqula okwenzakala kuZanu PF lapho okulokuxokozela lokufuthelana ngenxa yokuluphala kukaMugabe.
Kodwa-ke uMugabe owaziwa ngesitemo sokuthi nguGushungo ulakho ukuphazamisa konke okwenziwa yiG40 ngoba esaziwa ngokutshayanisa abantu amakhanda yena eziphethe esidukwini engasondezi muntu duzane laye.