Owayengumongameli wakwele Melika, uMnu. Donald Trump, ubesemthethwandaba eFlorida namuhla lapho amagqwetha akhe labatshutshisi akade bevezelana okuzakwethulwa emthethwandaba ngesikhathi ethoniswa icala lokugcina ingwalo zikahulumende eziyimfihlo emzini wakhe eMar-a-Lago awafihlela amapholisa ensitha aweFederal Bureau of Investigation.
UTrump ubhekane lamanye amacala agoqela elokuzama ukuguqula ngodlame impumela yokhetho olwaqhutshwa ngomnyaka ka2020, ukungenela kwezokhetho esabelweni seGeorgia lokunye.
Umthethwandaba weAppeals Court usanda kulahla isicelo sakhe sokuba engetheswa amacala ngoba wenza konke lokhu esesengumongameli. Ufisa ukuphanyeka udaba lolu edale leSupreme Court.
Banengi kwele Melika abadlana ingqondo ngokuzakwethulwa ngumthethwandaba lo. Omunye wabo nguMnu. Den Moyo, odabuka kwele Zimbabwe ohlala eMelika, othi idale leSupreme Court liyabe liphambanisile lingathi umongameli weMelika akumelanga abhekane lamacala awenza esesikhundleni.
UTrump uphika amacala wonke awetheswayo asekhankasela ngawo ukhetho lukamongameli oluzaqhutshwa ngoLwezi lonyaka.
Uthi imethetho igotshiswa ngendlela ezakwenza ukuba avalelwe entilongweni ngoba ulakho ukunqoba uTrump kukhetho lolu.
Abanye abakubandla lama Republicans abakusekeli akwenze esewofisini likamongameli besithi ulakho ukubhidliza ilizwe.
SEE ALSO:
Ingxoxo Esiyenze loMnu. Den Moyo