Idale labampathintambo eleCabinet lithi inkampani yendizamtshina eye Air Zimbabwe kumele iqhubekele phambili isebenza elizweni kodwa kuzamele iqugule indlela esebenza ngayo.
Umphathintambo wezokuthwalwa kwempahla labantu uMnu. Nicholas Goche utshele ikhomithi yezokuthwalwa kwempahla lebona ngezamankampani kahulumende ngoMvulo ukuthi kulandela ukudonselana lokuphikisana phakathi kwamabandla abusayo kudaba lwe Air Zimbabwe sokuvunyelenwe ukuba kuyadingakala linkampani ihlale ikhona ingavlwa kumbe ukuthengiswa kodwa kudingwe indlela ezingayiphathisa ukuba isebenze kuhle izimele.
Kusenjalo, ibandla le Movement for Democratic Change elikhokhelwa yinhloko kahulumende uMnu. Morgan Tsvangirai lithi liyasekela ukuvuselelwa kwe Air Zimbabwe ikakhulu nxa lokhu kuzakwenziwa lakumankampani kahulumende azimele wodwa.
Umsekeli wesikhulumeli sebandla leli uNkosazana Thabitha Khumalo uthi loba nje iMDC kade iphikisana lokuvuselelwa kwe Air Zimbabwe ivumelana lesinqumo sedale le cabinet ngenxa yokuthi le yinkampani yesizwe okungamelanga ibe sezandleni zamabandla abusayo.
UMaKhumalo uthi kuyaziwa ukuthi ibandla le Zanu PF yilo elabhidliza inkampani le ethwaliswe amagabha avuzayo ngamankampani amanengi womhlaba afuna ukubhadalwa izikwelede ezisindayo.
UGibbs dube weStudio 7 uxoxe loMaKhumalo othi kungamanga ukuthi uMongameli Robert Mugabe labanye bakhe bayabhadala iAir Zimbabwe ngesikhathi sonke lapho beyisebenzisa nxa besiya emazweni.
