Umthethwandaba waphezulu othetha indaba zesisekelo sombuso owe Constitutional Court ulahlele khatshana udaba lwabebandla le MDC Renewal, lokuphikisa ukuxotshwa kwamalunga alo edale lephalamende, usithi loludaba alula sisindo.
Ekwethuleni lesi sinqumo, umahluli omkhulu uChief Justice Godfery Chidyausiku, utshele idale ukuba sithethwe ngokubonisana lokuvumelana kwabo bonke beyisitshoyalolunye, engekho ophikisileyo.
UChidyausiku uthi lolu bekuludaba obeluvele kungamelanga lukhwezwe kulelidale laphezulu ele Constitutional Court, kungakho kuvunyelenwe ukuba lulahlwe, njalo izizatho zizakwaziswa kusikhathi esilandelayo kumagqwetha abemela amacele womabili.
Igqwetha ebelimmela abangamatshumi amabili lanye, abaxotshwa kuMDC-T, uProffessor Lovemore Madhuku, utshele intathelizindaba ngemva kokwethulwa kwalesi sinqumo, ukuba bayasamukela wengeza ethi kodwa asingamangalisi ngoba ubekukhangelele lokho.
Kuthi oze emmele umlawuli wedale lephalamende, umnumzana Simplicious Chihambakwe, uthi sibajabulisile lesi sinqumo ngoba besivele singekho isidingo sokuba lukhwezwe kulelidale.
UChihambakwe wengeze ethi kodwa kulilungelo lakhe wonke umuntu ukuyakwethula udaba lwakhe edale nxa engasuthiswa yindlela aphathwe ngayo, njengalokho okwenziwa ngabe MDC Renewal laba.
Amalunga alahlekelwe yizikhundla edale lephalamende ngemva kokuxotshwa ebandleni le MDC elikhokhelwa ngumnumzana Morgan Tsvangirayi, abalisa umnumzana Samuel Siphepha Nkomo basole kakhulu indlela umthethwandaba ophathe ngawo loludaba.
Wengeza uNkomo ethi lesi sinqumo sesigcwalise izifiso zecele le MDC-T, zokufuna ukunikeza izikhundla zobukhokheli edale lephalamende kubandla leZanu PF njengalokho osekusenzakala.
Kuthi isikhulumeli salelicele le MDC Renewal, umnumzana Jacob Mafume, utshele intathelizindaba laye ukuba kasingabamangalisi abebandla lakhe lesi sinqumo, esithi okubamangalisileyo ngumanyano osukhona phakathi kweZanu PF le MDC –T, kuloludaba.
Lesi sinqumo esithethwe yiConstitutional Court siza ngemva kokuba abe MDC Renewal bekhweze udaba lwabo befuna kuhluziswe indlela umlawuli wedale lephalamende aphathe ngayo udaba lokuxabana kwabo labebandla abahlephuka kilo ele MDC T, lapho baxotshwa khona, kwabangela ukulahlekelwa kwabo yizikhundla zokuba ngamalunga edale lephalamende.
Kunje abaxotshwayo laba, sebezibiza ngokuthi yiMDC Renewal Team, bekhokhelwa ngunkosikazi Sekai Holland okwamanje.