Abantu abanengi bathi lokhe bethithibele ngokwenziwe libutho leZimbabwe National Army elibulele abantu abayisikhombisa eHarare ngesikhathi kulabanye abakade betshengisela besola ikhomishini yeZimbabwe Electoral Commission ukuthi isiphuzile ukwethulela uzulu impumela yokhetho lukamongameli.
Abanye abantu bathi isenzo lesi sibakhumbuza umbhuqazwe weGukurahundi ezabelweni zeMatabeleland leNkabazwe ilizwe leZimbabwe lisanda kuthola uzibuse.
Amasotsha kahulumende abulala abantu abafika inkulungwane ezingamatshumi amabili – 20,000 kumbhuqazwe lo.
Omunye wabasola kakhulu okusanda kwenzakala eHarare nguMnu. David Nkomo othi kuyamangalisa ukuthi uhulumende osehlale embusweni okwesikhathi eside kangaka usebenzisa ibutho ukuthi libulale abantu abangelacala.
“Lokhu kayisiyonto yakuqala kusenzakala mfowethu. Ngo1983 iZanu yabaqeda abafowethu eMatabeleland. Kuyinto ezwisa usizi ukuthi uhulumende sengaze abelolaka lokuthi abulale abantu bakhe ethumela ibutho.”
Lokhu kugcizelelwe nguMnu. Iphithule Maphosa, isikhulumeli sebandla le Zapu, othi kumele uhulumende ahlolisise okwehlela abantu abadutshulwa ngamapholisa njalo lokuthi ibutho leli lalingaphansi kukabani.
“Yikho sisithi kubelokudingisisa, nxa kubelokwehluleka ukuwenza umsebenzi ngumongameli, akumelanga abelaso lesosikhundla ngoba kutsho ukuthi usehluthunelwe amandla libutho okuyingozi enkulu kakhulu ebantwini beZimbabwe.”
UMnu. Mnangagwa ufisa ukuthi udaba lolu luphendlwe ngabantu abazimele bodwa ukwenzela ukuthi kuvele egcekeni ukuthi ngubani owatshela ibutho ukuthi lingene emigwaqweni libulale abantu.
UMnu Thembani Sibindi uthi la ngamazwi omuntu nje odinga ukuthakazelelwa nguzulu njengoba kukhanya engani ukhala ngelihlo elilodwa.
“Loba nje esenza izithembiso zokuthi uzenza loba yini esemandleni akhe ukuze akulungisise uyaphosisa nje. Lokhu sakubona kuSimplicuous Chihambakwe Gukurahundi Commission eyasungulwayo kodwa kayisazanga yaphenduka ukuze yazise uzulu ngalokho eyakutholayo okutsho ukuthi kakulanto azayenza uMnangagwa.”
Ongunobhala wabasakhulayo kubandla leZanu PF, uMnu. Munashe Mtutsa, uthi okwenzakala ekupheleni kokhetho kubalela indaba ezisadingisiswa njalo akuqondanga ukuthi lezizinto zikhulunywe zingakadingisiswa.
“Okunengi nje okwenzakayo mhlaka 1 yizinto nje ezenzakalayo emhlabeni wonke jikelele njalo kakusonto esingakhuluma ngayo ngoba umongameli wathembisa ukuthi lezi yizinto azazilungisisa engagcotshwa. Wathembisa ukuthi uzasungula ikhomitshini ezakudingisisa lokhu njalo zeChihambakwe Commission asikhulumeni ngayo umongameli esegcotshiwe.”
Amazwe atshiyeneyo athi kuyayangisa okwenzakale eHarare lapho ibutho elilokhe likhona emphakathini.
Your browser doesn’t support HTML5
Udaba Esilethulelwe NguGibson Bhebhe