Idale lephalamende ele National Assembly liqale ukuhlaziya okumunyethwe yi budget yomnyaka ozayo, kodwa amalunga aphuzile ukuqala linkulumo ngemva kokuba abebandla eliphikisayo le MDC-T, bebeke umphathintambo wezemali umnumzana Patrick Chinamasa, umlandu wokwephula umthetho ekwethuleni li Budget.
Okhokhela amalunga e MDC-T edale lephalamende , umnumzana Innocent Gonese, utshele lelidale ukuba isisekelo sombuso, sikubeka sobala ukuba isilinganiso sokuhlanu ekhulwini, se budget kumele kube yimali eya kuhlangothi olubona ngezokuthuthukiswa kwezabelo kodwa uChinamasa akakwenzanga lokho kweka 2016.
UGonese uthi uChinamasa bekumele aqale aphiwe imvumo lidale, ekuhleleni kwakhe limali anduba ayethulele ilizwe li budget.
Wathi kungaleso sizatho, idale kumele kelime ukuhlaziya phezu kokumunyethwe yi budget uChinamasa aze akulungisise lokho.
Umlawuli wedale umnumzana Jacob Mudenda uthe uyavumelana lembono ka Gonese le.
Kodwa umphathintambo wezemali uChinamasa, uthe kenelisi ukutholisa izabelo leyo mali njengoba ungekho umthetho omupha indlela yokukwenza lokho. Ethi idale lephalamende kumele libumbe umthetho ozalawula phezu kokusebenza kohlangothi lukahulumende lwezabelo njalo nxa sekuthe kwenziwa lokho, kulapho azazabela imali.
Kodwa uGonese uthi kungasi mlandu wamalunga edale lokho, ukuba lokhe engakayilungisi imithetho uhulumende phezu kohlangothi lwezabelo, ethi kungumsebenzi wehofisi yabaphathintambo lomongameli ukwenze njalo.
UChinamasa ukuvumile lokho wacela idale ukuba limxolelele kulokho kusebenzisa imali obekungahlelelwanga kubudget kuwonalo umnyaka ethi lokhu kubangelwe yikuqutshwa kokhetho lwama by elections, obekungahlelelwanga.
Kusenjalo, uze waqala umsebenzi wokuhlaziya i budget yamabillion amane amadollar-$4 billion, yomnyaka ozayo njalo idale likhangelelwe ukuba liyamukele kuyonale iviki.
Idale lephalamende selike lamisa yonke imithetho yokusebenza kwedale ngenjongo yokuba ziyipasise li budget.