Iqembu lomdlalo wenguqu ele Highlanders linqobe kumncintiswano we Bulawayo Football Festival ngemva kokutshaya ele Bulawayo City nge 1 ka nya ngeSonto enkundleni ye Barbourfields.
Umncintiswano we Bulawayo Football Festival ungenwe ngamaqembu amane agoqela ele Highlanders, ele Bulawayo City, ele How Mine kanye lele Tsholotsho.
Iqembu lenguqu eleBulawayo City
Emdlalweni wakuqala iqembu le Bulawayo City lidibane lele Tsholotsho njalo iqembu likaMasipala linqobe nge 3 ka 1 ngemva kokutshaywa kwembekwa.
Umdlalo ubufike emaphethelweni kungela qembu elenelise ukulitshayela emambuleni.
Emdlalweni wesibili iqembu le Highlanders linqobe ele How Mine nge 4 ka 2 lakho ngemva kokutshaywa kwembekwa futhi njengoba isikhathi siphele zingutshiki lobhanqa 1 ka 1.
Emdlalweni wokudinga iqembu eliqede likundawo yesithathu iqembu le How Mine likhulele ele Tsholotsho nge 1 ka nya kodwa umqeqetshi weqembu le Tsholotsho uLizwe Sweswe uthi impumela akusiyo ebiqakathekile njalo limidlalo imphathise ukuba abone ukuba yibaphi abafana abangakumela ukudlala kusigaba sePremier Soccer League.
Umqeqetshi weqembu lenguqu ele Tsholotsho uLizwe Sweswe
"Ukudlala limidlalo kuphathisile ukuba sibone ukuba yibaphi abafana abangadlala njalo yibaphi okuzabanzimela. Yonale imidlalo izangiphathisa ukuba ngikhethe ukuba yibaphi engizasebenza labo lonyaka"
Ku final iqembu le Highlanders linqobe ele Bulawayo City nge 1 ka nya njalo umklomelo weBosso uvele kumgadli osakhulayo uPrince Dube.
Umdlali weHighlanders uPrince Dube emakane loTerrence Majo owe Bulawayo City
Umfoka Dube, yena oleminyaka elitshumi lathoba munwe munye, ngomunye wabadlali abasakhulayo abagoqela uAdrian Silla kanye lo Brian Banda abatshengise ukuba balakho ukusukumisa abalandeli beqembu le Highlanders lonyaka.
................................................................................................
Kolunye udaba olumayelana lomdlalo wenguqu iqembu le Chicken Inn selinxuse abalandeli bomdlalo wenguqu abafuna ukuyalibukela lidlala lele Mamelodi Sundowns ngempelaviki ezayo ukuba behlawule ama rand angamakhulu ayisikhombisa.
Limali igoqela eyokuya elizweni le South Africa, ukungena enkundleni kanye lokuphenduka eZimbabwe.
Iqembu lenguqu ele Chicken Inn
Ibhasi labalandeli leli lizabe lizasuka koBulawayo ngoLwesihlanu ntambama liphenduke ekupheleni komdlalo ngoMgqibelo.
Lumdlalo uzadlalwa ebusuku ngehola lesitshiyagalombili enkundleni yeLucas Moripe esedolobheni lePitoli.