Iqembu lenguqu eleHighlanders lizangqikilana le Ngezi Platinum kunkezo ye Chibuku Super Cup. IHarare City le FC Platinum lazo zizabhuqana zifuna ukungena kumafinals omncintiswano wale inkezo.
Lokhu kuvezwe ngoLwesibili yinhlanganiso yenguqu eyeCastle Lager Premier Soccer League exhege amaqembu la ngokudobha amabizo awo phakathi kwesitsha ngokusensitha.
UMnu. Emmet Ndlovu, unobhala jikelele weqembu leBosso, utshele iStudio 7 ukuthi abadlali beHighlanders bazazama ngamandla wonke ukuthi banqobe iNgezi Platinum.
“Siyakubongela mpela ukuthi idraw isiyenzakele eyeChibuku. Esikukhangeleyo yikuthi kuzongqikilwana ngoba wonke amaqembu athe afika kulelizinga kusobala ukuthi kumele bafike khonalapho. Sikhangelele ukuthi umdlalo awusoze ubelula nje …”
Uthe lesi yisikhathi sokuthi kubonakale ukuthi abadala ngobani.
Your browser doesn’t support HTML5
Ingxoxo Esiyenze LoMnu. Emmet Ndlovu
Iqembu elizaphakamisa inkezo ye Chibuku Super Cup lizathola amadola azinkulungwane ezingamatshumi ayisikhombisa lanhlanu kuthi elizadliwa ku final lizathola inkulungwane ezingamatshumi amahlanu.
Lawo azehluleka ukuchapha kusigaba se semi-final azathola inkulungwane ezingamatshumi amabili lanhlanu kuthi lawa adliwe ngempelaviki edluleyo kusigaba se quarter-final azathola inkulungwane ezilitshumi lanhlanu ikanti lawo ahle aphelelwa ngumphako kusigaba sakuqala kumcintiswano lo azathola inkulungane ezilitshumi kuphela.
Iqembu le Harare City yilo eliphakamise linkezo eye Chibuku Super Cup nyakenye njalo lithe ngokunqoba kwalo lokhu layamela ilizwe kumncintiswano we Caf Confederations Cup.