Ibhanga elikhulu lamazwe womhlaba eleWorld Bank selethule impumela yophenyo oluveza ukuba isimo sendlala eZimbabwe sesisibi ngamandla, okuzadala ukuba abantu abanengi bakhangelele kusizo lokudla okuzamele luvele kunhlanganiso ezizimeleyo lohulumende.
Ibhanga leli lithi lobanje iZimbabwe inothile ngakho konke okwenjiwayo akula mali enelayo eyokuthengela abantu bonke abalambayo ukudla ngesikhathi sendlala eyesabekayo.
Lokhu kuza ngesikhathi uhulumende eyethule ngoLwesibili imibiko ephikisanayo ngesimo sendlala elizweni.
UMongamei Emmerson Mnangagwa uhlala ekhuluma ukuthi eleZimbabwe lilokudla okwenela umuntu wonke. Kodwa ugatsha lwezokulima lubikele iphalamende ukuba eleZimbabwe likhangelane lendlala embi ngoba izilimo ezifika isilinganiso sokungamatshumi amathathu ekhulwini -30% kuphela yizo zodwa ezilakho ukuba lesivuno esikhanyawo kuthi amasimu ayisilinganiso sokungamatshumi ayisikhombisa ekhulwini - 70% asetshile njalo abalimi kabasoze bedobhe luthu lonyaka.
UMnu. Obert Jiri unobhala omkhulu ewofisini yomphathintambo wezokulima, utshele ikhomithi yezokuvikelwa kwelizwe ephalamende, ukuthi uhulumende wanikeza abalima abangaba yisilinganiso samatshumi amabili lasithupha ekhulwini - 26% inhlanyelo lomquba phansi kohlelo lwe-Intwasa kodwa inengi labo sebetshelwe yizilimo.
Uphinde wathi uhulumende ubethemba ukuba abalima izilimo zasendulo ezifana lenyawuthi, uphoko lamabele bebelakho ukuvuna kodwa kukhanya sekukubi.
“Uhlupho esikulo luyesabeka. Silendlala eyesabekayo lonyaka. Silethemba lokuba labo abalima bethelezela bazasisiza kodwa akusoze kwenele.’’
Omunye umlimi olima phansi kwendun uGwesela eZhombe, uMnu. Bright Tshuma, uthi kuliqiniso ukuba isimo sendla eselizweni sesisethusa.
“Kulendlala eyesabekayo lonyaka. Izilimo zonke esazilimayo kazivuthwanga okutsho ukuba asisoze sithole lutho ngoba izulu kalinaka kuhle vele.’’
Lokhu kusekelwe ngomunye umlimi wako Seke, uMnu. Richard Ncube, othi kumele kuthathwe amanyathela khona manje ngoba umumo khona uzoba mubi ngamandla kunyanga ezilandelayo.
“Uhulumende kumele angenele aphe abantu okokudla ngoba indlala esilayo leyi kayizake ibonakale. Kumele siqale ukuphiwa ukudla khathesi ngoba vele asisela lutho.’’
Ebuzisiswa ngamalunga edale lephalamende uJiri ukuba ugatsha lwakhe lwenzani, uthe uhulumende usebenza lenhlanganiso ezizimeleyo ukulungisisa udaba lolu ukuze kungabi lomuntu ozabulawa yindlala.
Ingcwethi ezicubungula ezenhlalakahle kazulu lokunakekelwa kwakhe zithi ngabe uMnangagwa wethula umthetho wokuma manzonzo kwesimo sendlala eZimbabwe njengalokho okwenziwe yinkokheli yamanye amazwe, egoqela kwele Zambia, ukuze liphathiswe phansi kwenhlelo zenhlanganiso zamazwe womhlaba ezifana leWorld Bank, World Food Program lezinye.
Uhulumende usanda kuxotsha elizweni abasebenza kuhlangothi lukahulumende wakwele Melika ebona ngenswelo zikazulu lokunye olweUnited States International Development Aid esithi bebefuna ukuzedunga umphakathi.
Yena uMnangagwa lokhu esima ngokuthi eleZimbabwe lilakho ukudla okwenela umuntu wonke ekuvikeleni indlala edalwe yisimo soguquka komkhathi okuphehle isikhudumeze esaziwa ngokuti yi- El Nino.
Lanxa iWorld Bank isithi iZimbabwe inothe okwamagama ngokwenjiwayo, akula mali enelayo engena esikhwameni sikahulumende engasetshenziswa ukuthengela uzulu olambayo ukudla.
Uhulumende yena usola izijeziso zenotho, ezafakelwa inkokheli yebandla leZanu PF ngele Melika lamanye amazwe angentshonalanga, esithi yizo eziphazamisa isimo somnotho welizwe. Kodwa eleMelika lithi lokhu kubangelwa ngumbuso weZanu PF ongananzi intando kazulu njalo ogcwele inkohlakalo.
Lonyaka ilizwe lithole izulu eliphansi kakhulu ngesikhathi ingcitshi zezokulima lezomkhathi zikhuthaza uhulumende ukuba aphume lamacebo okumelana lodubo lokuguka komkhathi ngoba sokusobala ukuthi izinga lokuna kwezulu lizaqhubeka liphambaniseka.