Usibalukhulu webhanga elikhulu lelizwe eleReserve Bank of Zimbabwe, uMnu. John Mangudya, useyethule isinqumo sokuthi akumelanga kukhuphulwe iholo lezisebenzi lonyaka ngenxa yokungamanga kuhle komnotho weZimbabwe.
UMangudya, owethule umbiko wakhe ngesimo senotho yelizwe salonyaka lamuhla eHarare ese 2015 Monetary Policy Statement, uthe umnotho welizwe ulakho ukubhidlika nxa izisebenzi zika hulumende lezamankampani azimele wodwa zingengezelelwa iholo.
Uthe kumele amankampani ayehlise intengo yempahla yabo ukuze incintisane laleyo ethengwa kwamanye amazwe elentengo ephansi.
UMangudya wethule umbiko lo ngesikhathi ilizwe likhangele ukuthi umnotho uzathuthuka ngesilinganiso sokwedlula kancane okuthathu ekhulwini – 3.2 percent lonyaka.
Ingcwethi kwezenotho zithi umnotho welizwe kawuthuthuki ngemfanelo ngenxa yohlelo lokwabela uzulu amashares amankampani emazweni olwe Indigenization, ukuswelakala kwemali yokuvuselela amafekithali njalo lemithetho yelizwe eminengi engaqedakaliyo.
Ukuze sihlaziye okwethulwe nguMangudya, sixoxe loMnu. Percy Mcijo olwela ilungelo lezisebenzi.